ایس سی او نیشنل کوآرڈینیٹرز دا رابطہ کاری تے عملی تعاون اُتے اتفاق

چیئرمین شپ دیاں سرگرمیاں، اگلے اجلاساں اُتے غور، نائب وزیراعظم نے چیئرمین شپ دیاں ترجیحات اُجاگر کیتیاں، ایس سی او چیئرمین شپ ساڈے گواںڈ وچ آنا خوشی دی گل، ایہہ اہم موقع اے: بھارتی کوآرڈینیٹر

اسلام آباد پاکستان دی زیرِ صدارت شنگھائی تعاون تنظیم دے تین روزہ اجلاس وچ رکن ملکاں وچ مسلسل رابطہ کاری تے عملی تعاون جاری رکھن اُتے اتفاق کیتا گیا۔ شنگھائی تعاون تنظیم (ایس سی او) دے رکن ملکاں دے قومی رابطہ کاراں نے تنظیم دے اہداف تے مقاصد نوں مسلسل رابطہ کاری تے عملی تعاون دے ذریعے اگے ودھاؤن دے عزم دا اعادہ کیتا۔

ایس سی او نیشنل کوآرڈینیٹرز دا پہلا اجلاس اسلام آباد وچ ہویا، جس دی صدارت پاکستان لئی ایس سی او دے نیشنل کوآرڈینیٹر ڈاکٹر فیصل نے کیتی۔ اجلاس وچ ایس سی او دے رکن ملکاں دے نیشنل کوآرڈینیٹرز تے ایس سی او سیکرٹریٹ دے نمائندیاں نے شرکت کیتی۔

دفترِ خارجہ دے مطابق اجلاس دوران نیشنل کوآرڈینیٹرز نے پاکستان دی چیئرمین شپ تحت ہون والیاں مجوزہ سرگرمیاں دے پروگرام دا جائزہ لیا۔ اجلاس وچ اہم اقدامات نال متعلق پیش رفت اُتے گل بات ہوئی، جدوں کہ اگلے ایس سی او اجلاساں تے تقریباّت دیاں تیاریواں اُتے وی تبادلہ خیال کیتا گیا۔

اجلاس وچ رکن ملکاں وچ رابطہ کاری نوں ہور مضبوط بناؤن تے پاکستان دی چیئرمین شپ دیاں ترجیحات اُتے مؤثر عملدرآمد یقینی بناؤن دے حوالے نال وی تبادلہ خیال کیتا گیا۔ ایہہ سارے اقدامات پاکستان دی چیئرمین شپ دے موضوع “تصور نوں عمل وچ بدلنا، رابطہ کاری، جدت تے سانجھی خوشحالی” دے مطابق نیں۔

طے شدہ پروگرام دے تحت ایس سی او دے وفود تے سیکرٹریٹ دے نمائندیاں نے پاکستان نیشنل کونسل آف دی آرٹس دا دورہ کیتا، جتھے انہاں نوں پاکستان دے بھرپور ثقافتی ورثے تے وکھ وکھ فنون تے فنکارانہ روایتاں بارے آگاہ کیتا گیا۔

وفد نے نصیر بندہ ہاکی سٹیڈیم دا وی دورہ کیتا، جتھے انہاں نوں 20 نومبر توں ہون والے ایس سی او ہاکی ٹورنامنٹ دی میزبانی دے انتظامات تے ایونٹ لئی کیتیاں جان والیاں تیاریواں بارے بریفنگ دِتی گئی۔

نیشنل کوآرڈینیٹرز نے وزارتِ خارجہ وچ وزیرِ خارجہ اسحاق ڈار نال ملاقات کیتی۔ اسحاق ڈار نے پاکستان دی ایس سی او چیئرمین شپ دیاں ترجیحات نوں اُجاگر کیتا تے تنظیم دے مقاصد نوں اگے ودھاؤن لئی سارے رکن ملکاں نال قریبی تعاون جاری رکھن دے عزم دا اعادہ کیتا۔

اس اجلاس وچ بھارت دے نیشنل کوآرڈینیٹر نے وی شرکت کیتی۔ ایس حوالے نال ذرائع نے روزنامہ دنیا نوں نام ظاہر نہ کرن دی شرط اُتے دَسیا کہ بھارت دے نیشنل کوآرڈینیٹر نے ساریاں سرگرمیاں وچ شرکت کیتی تے انہاں دا رویہ دوستانہ تے مثبت رہیا۔

بھارت دے نیشنل کوآرڈینیٹر نے پاکستان ٹیلی ویژن نال گل بات وی کیتی۔ انہاں آکھیا کہ ایس سی او دی چیئرمین شپ ساڈے گواںڈ وچ آئی اے، ایہہ خوشی دی گل اے تے اک اہم موقع اے۔

انہاں آکھیا کہ ایس سی او دے تحت ویلفیئر تے خوشحالی لئی ایجنڈا طے کیتا گیا اے۔ ایس وچ اہم ایجنڈا کنیکٹیویٹی یعنی رابطہ کاری، تجارت تے ٹرانزٹ اے۔ ایہہ اہم اے تے انہاں ساریاں چیزاں اُتے گل بات ہوئی اے۔ امید اے کہ ایس سی او دے ایجنڈے دے تحت اگے ودھاں گے۔

انہاں مزید آکھیا کہ میں پہلی واری اسلام آباد آیا ہاں تے مینوں خوشی ہو رہی اے۔ لاہور، فیصل آباد تے سیالکوٹ ویکھن دی خواہش اے۔ لاہور نوں ایس سی او دا ثقافتی شہر قرار دِتا گیا اے۔ پورا سال پاکستان دی زیرِ صدارت ایہہ سرگرمیاں جاری رہن گیاں تے امید اے کہ پاکستان نوں ہور وی ویکھن دا موقع ملے گا۔