سرمایہ کاری لئی ریگولیٹری اصلاحات ناگزیر: وزیراعظم
صوبیاں وچ ہم آہنگی لئی آسان کاروبار ایکٹ نوں ملک بھر وچ نافذ کیتا جاوے، شہباز شریف دا ایرانی وزیرِ خارجہ نال ٹیلیفونک رابطہ، ہمشیرہ دے انتقال اُتے تعزیت
اسلام آباد (نامہ نگار) وزیراعظم شہباز شریف نے آکھیا اے کہ کاروباری سرگرمیاں وچ آسانی تے سرمایہ کاری دے فروغ لئی ریگولیٹری اصلاحات ناگزیر نیں۔ حکومت کاروباری برادری نوں سہولت فراہم کرن تے غیر ضروری ضابطہ کاری دے خاتمے لئی مؤثر اقدامات کر رہی اے۔ انہاں خیالات دا اظہار وزیراعظم نے ریگولیٹری اصلاحات دے حوالے نال اک اہم اجلاس دی صدارت کردیاں کیتا۔
وزیراعظم نے آکھیا کہ ڈرگ ریگولیٹری اتھارٹی وچ اصلاحات دے ذریعے اینوں جدید خطوط اُتے استوار کیتا گیا اے، ایس طرز اُتے ہور ریگولیٹری اداریاں وچ وی اصلاحات لیاندیاں جان۔ وزیراعظم نے ہدایت کیتی کہ ریگولیٹری رجسٹری تشکیل دِتی جاوے تاں جو ملک وچ موجود سارے ریگولیٹری تقاضیاں تے قواعد و ضوابط نوں اک جامع نظام دے تحت مرتب کیتا جا سکے۔
وزیراعظم نے آکھیا کہ کاروبار وچ آسانی لئی آسان کاروبار ایکٹ نوں ملک بھر وچ نافذ کیتا جاوے تاں جو سارے صوبیاں وچ ریگولیٹری نظام وچ ہم آہنگی پیدا ہووے تے کاروباری افراد نوں یکساں سہولتاں میسر آون۔ وزیراعظم نے ہدایت کیتی کہ ریگولیٹری اصلاحات دے اثرات تے افادیت دا جائزہ لین لئی انہاں اصلاحات دی تھرڈ پارٹی ویلیڈیشن وی کرائی جاوے تاں جو اصلاحات دے عملی نتائج دا غیر جانب دارانہ جائزہ لیا جا سکے۔
وزیراعظم نے آکھیا کہ کاروبار وچ آسانی سرمایہ کاری دے فروغ لئی بنیادی اہمیت رکھدی اے۔ سرمایہ کاراں نوں سازگار تے سہل کاروباری ماحول فراہم کیتے بغیر ملکی تے غیر ملکی سرمایہ کاری دے مطلوبہ اہداف حاصل نہیں کیتے جا سکدے۔
اجلاس نوں دَسیا گیا کہ بزنس فیسیلی ٹیشن سنٹر نوں پنجاب حکومت دی E-BIZ دی طرز اُتے جدید بنایا جا ریا اے۔ ایکسپورٹ پالیسی آرڈر تے امپورٹ پالیسی آرڈر نوں سہل بنایا جا ریا اے۔ ایس آئی ایف سی ریگولیٹری ریفارمز دے حوالے نال سارے صوبیاں، بشمول آزاد کشمیر تے گلگت بلتستان، نال رابطے وچ اے۔
کابینہ دی ریگولیٹری ریفارمز کمیٹی نے 7 ملٹی سیکٹرز وچ 557 ریفارمز دی منظوری دِتی اے، جنہاں نال سالانہ 460 ارب روپے دی بچت متوقع اے۔
دریں اثنا شہباز شریف نال وزیرِ ریلوے حنیف عباسی نے ملاقات کیتی۔ حنیف عباسی نے وزیراعظم نوں وزارتِ ریلوے نال متعلقہ امور تے جاری ترقیاتی منصوبیاں بارے بریفنگ دِتی۔ وزیراعظم نے ٹرین دے سفر وچ عوام دی سہولت تے حفاظت نوں یقینی بناؤن لئی مزید مؤثر اقدامات کرن دیاں خصوصی ہدایتاں دِتیاں۔
وزیراعظم نے آکھیا کہ ریلوے ٹریکاں دی بروقت مرمت تے دیکھ بھال نوں یقینی بناؤن لئی عملی اقدامات کیتے جان۔ ریلوے فریٹ سروس نوں ہور فعال کرنا ناگزیر اے۔ ملاقات وچ ہور باہمی دلچسپی دے امور اُتے وی تبادلہ خیال کیتا گیا۔
علاوہ ازیں وزیراعظم نے ایران دے وزیرِ خارجہ عباس عراقچی نال ٹیلیفون اُتے گل بات کیتی تے انہاں دی ہمشیرہ دے انتقال اُتے دلی تعزیت تے گہرے افسوس دا اظہار کیتا۔
