شمالی وزیرستان: فورسز دا آپریشن، 7 خوارج ہلاک، ڈی جی خان: چیک پوسٹاں اُتے ڈرون حملہ ناکام
عیدک وچ انٹیلی جنس بیسڈ کارروائی، جنگی مہارت نال دہشتگرداں دا تعاقب، ٹھکانے وی تباہ، تونسہ شریف وہوا وچ پولیس چیک پوسٹاں نوں ڈرون نال نشانہ بنایا گیا، 1 اہلکار زخمی، جوابی کارروائی اُتے دہشتگرد فرار
پشاور، اسلام آباد، ڈی جی خان (ڈسٹرکٹ رپورٹر، نامہ نگار، مانیٹرنگ ڈیسک) خیبرپختونخوا دے ضلع شمالی وزیرستان دے علاقے عیدک وچ سکیورٹی فورسز نے انٹیلی جنس بیسڈ آپریشن دوران 7 خوارج نوں ہلاک کر دِتا۔
سکیورٹی ذرائع دے مطابق سکیورٹی فورسز نے بھرپور عزم تے جنگی مہارت نال فتنہ الخوارج دے دہشتگرداں دا تعاقب کیتا تے انہاں دے ٹھکانے وی تباہ کر دِتے۔
صدر آصف علی زرداری تے وزیراعظم شہباز شریف نے فورسز نوں خراجِ تحسین پیش کیتا۔ صدر زرداری نے آکھیا کہ عزمِ استحکام دے تحت دہشتگردی دے مکمل خاتمے تے پائیدار امن دے قیام لئی سکیورٹی فورسز دیاں کاوشاں قابلِ تحسین نیں۔
شہباز شریف نے آکھیا کہ سکیورٹی فورسز تے قانون نافذ کرن والے اداریاں دے افسراں تے جواناں دی شاندار کارکردگی ملکی امن تے سلامتی دی ضامن اے۔
وزیرِ داخلہ محسن نقوی نے آکھیا کہ فورسز دے بہادر سپوت پوری قوم دا سرمایۂ افتخار نیں۔
دریں اثنا فتنہ الخوارج دے دہشتگرداں نے پنجاب تے خیبرپختونخوا دی صوبائی سرحد اُتے تونسہ شریف، وہوا وچ قائم جھنگی تے لکھانی پولیس چیک پوسٹاں اُتے ڈرون حملہ کیتا۔ ڈیرہ غازی خان پولیس نے بروقت کارروائی کردیاں حملہ ناکام بنا دِتا، تاہم لکھانی چیک پوسٹ اُتے ڈرون حملے دے نتیجے وچ اک پولیس ملازم معمولی زخمی ہو گیا۔
پولیس دی جوابی کارروائی اُتے دہشتگرد فرار ہو گئے۔
