شہری لاپتہ، ایس ایچ او بہارہ کہو توں پیر تک رپورٹ طلب
عدالت دے حکم اُتے پٹیشن وچ نامزد ملزمان پیش، مغوی دی تحویل توں انکار
اسلام آباد (اپنے نامہ نگار توں) اسلام آباد ہائیکورٹ نے وفاقی دارالحکومت توں مبینہ لاپتہ مسیحی شہری دی بازیابی دے کیس وچ پولیس نوں دوناں فریقین نوں سن کے رپورٹ عدالت وچ پیش کرن دی ہدایت کر دِتی۔
وکیل نے موقف اختیار کیتا کہ درخواست گزار دا خاوند افضل تھانہ بہارہ کہو دے علاقے ملپور توں لاپتہ اے۔ بااثر شخص نے بھینس چوری دے الزام وچ افضل مسیح نوں حبسِ بے جا وچ رکھیا ہویا اے۔
ڈی ایس پی لیگل ساجد چیمہ نے آکھیا کہ پیر تک دا وقت دِتا جاوے۔ جسٹس ارباب محمد طاہر نے آکھیا کہ پیر تک دا وقت نہیں اے، اک گھنٹے وچ مغوی نوں بازیاب کرا کے عدالت وچ پیش کرو۔
وقفے توں بعد دوبارہ سماعت دوران تھانہ بہارہ کہو پولیس نے پٹیشن وچ نامزد راجہ یاسر تے فیصل نوں عدالت وچ پیش کر دِتا، جنہاں نے عدالت نوں دَسیا کہ مغوی ساڈی تحویل وچ نہیں اے، ساڈا اوہدے نال لین دین دا معاملہ اے۔
عدالت نے ایس ایچ او بہارہ کہو نوں فریقین نوں سن کے پیر تک رپورٹ پیش کرن دا حکم دِتا۔
جسٹس خادم حسین سومرو نے خاتون لیڈی ڈاکٹر دے گھر اُتے قبضے خلاف درخواست وچ وفاقی پولیس نوں لیڈی ڈاکٹر نزہت شکور نوں تحفظ فراہم کرن لئی اقدامات کرن دی ہدایت کردیاں ایس ایس پی تے تھانہ ہمک دے ایس ایچ او نوں جواب لئی نوٹس جاری کر دِتے۔
