اگے ودھن لئی پالیسیواں دا تسلسل ناگزیر: عظمیٰ بخاری
ملکی ترقی کسے اک صوبے یا حکومت دی نہیں، ساڈے ساریاں دی سانجھی ذمہ داری اے، عوامی بھلائی دیاں پالیسیاں سیاسی تبدیلیاں دی نذر نہیں ہونیاں چاہیدیاں: وزیرِ اطلاعات
لاہور (سٹاف رپورٹر) وزیرِ اطلاعات تے ثقافت پنجاب عظمیٰ بخاری نے آکھیا اے کہ پاکستان نوں اگے ودھانا اے تاں پالیسیواں دا تسلسل ناگزیر اے۔ وزیراعلیٰ پنجاب مریم نواز شریف دا واضح مؤقف اے کہ حکومتاں تبدیل ہُندیاں رہن، پر قومی وژن تے عوامی بھلائی دیاں پالیسیاں تبدیل نہیں ہونیاں چاہیدیاں۔
عظمیٰ بخاری نے مزید آکھیا کہ پاکستان دی ترقی کسے اک صوبے، حکومت یا سیاسی جماعت دی نہیں، بلکہ ساڈے ساریاں دی سانجھی ذمہ داری اے۔ ملک دی ترقی تے عوامی بھلائی لئی بنائیاں جان والیاں پالیسیاں نوں سیاسی تبدیلیاں دی نذر نہیں ہونا چاہیدا۔
وزیرِ اطلاعات نے آکھیا کہ جے اج بنائی جان والی پالیسی کل صرف سیاسی تبدیلی دی وجہ نال ختم یا تبدیل ہو جاوے تاں ملک اگے نہیں ودھ سکدا۔ پاکستان نوں وقتی سیاسی ایجنڈیاں دی بجائے مستقل قومی وژن تے پالیسیواں دے تسلسل دی لوڑ اے۔
انہاں آکھیا کہ قومی ترقی لئی ضروری اے کہ حکومتاں دی تبدیلی دے باوجود عوامی بھلائی، معاشی ترقی تے ملکی مفاد نال متعلق پالیسیاں دا تسلسل برقرار رہے۔
