فیلڈ مارشل نال اقوام متحدہ دے سیکرٹری جنرل دی ملاقات، سندھ طاس معاہدے اُتے گل بات
مسئلہ کشمیر، افغانستان توں دہشت گردی دے چیلنجاں اُتے وی تفصیلی تبادلہ خیال، گوتریس نے امن دیاں کوششاں نوں سراہیا، چیف آف ڈیفنس فورسز عاصم منیر نال بیلاروس دی سکیورٹی کونسل دے وفد دی ملاقات، تعاون ودھاؤن اُتے اتفاق
راولپنڈی اقوام متحدہ دے سیکرٹری جنرل انتونیو گوتریس نے جنرل ہیڈکوارٹرز (جی ایچ کیو) راولپنڈی دا دورہ کیتا تے چیف آف ڈیفنس فورسز فیلڈ مارشل سید عاصم منیر نال اہم ملاقات کیتی۔
آئی ایس پی آر دے مطابق ملاقات دوران باہمی دلچسپی دے امور، خطے دی موجودہ سکیورٹی صورتحال تے بین الاقوامی امن و سلامتی دے فروغ وچ اقوام متحدہ دے کردار اُتے تفصیلی گل بات کیتی گئی۔
دونوں رہنماواں نے خطے دے مجموعی استحکام، مسئلہ جموں و کشمیر، بھارت ولوں سندھ طاس معاہدے دی معطلی تے افغانستان دی سرزمین توں جنم لین والی دہشت گردی دے چیلنجاں اُتے تفصیلی تبادلہ خیال کیتا۔
ایس موقع اُتے فیلڈ مارشل نے عالمی امن و امان لئی پاکستان دے پکے عزم دا اعادہ کردیاں اقوام متحدہ دے امن مشناں وچ پاک فوج دیاں تاریخی تے قیمتی خدمات نوں اجاگر کیتا۔
اُنہاں عالمی سطح اُتے امن قائم کرن، علاقائی استحکام تے انسانی ہمدردی دے شعبیاں وچ اقوام متحدہ دے کردار تے سیکرٹری جنرل انتونیو گوتریس دی قیادت نوں سراہیا۔
اقوام متحدہ دے سیکرٹری جنرل انتونیو گوتریس نے دہشت گردی دے خلاف جنگ تے اقوام متحدہ دے امن مشناں وچ پاکستان تے اس دیاں مسلح افواج دیاں بے مثال قربانیاں تے لازوال خدمات اُتے زبردست خراجِ تحسین پیش کیتا۔
اُنہاں بین الاقوامی امن تے استحکام لئی پاکستان دے مسلسل تے فعال کردار دا اعتراف کردیاں علاقائی تنازعات دے پُرامن حل لئی پاکستان دیاں سفارتی تے عملی کوششاں دی خصوصی تعریف کیتی۔
انتونیو گوتریس نے ’ایکس‘ اُتے اپنے بیان وچ پاکستان نوں موسمیاتی بحران توں سب توں زیادہ متاثر ہون والے ملکاں وچ شامل کردیاں عالمی برادری توں گرین ہاؤس گیسز دے اخراج وچ فوری کمی دا مطالبہ کیتا۔
اُنہاں آکھیا کہ پاکستان عالمی سطح اُتے کاربن اخراج وچ انتہائی معمولی حصہ پاؤن دے باوجود موسمیاتی تباہی دی صفِ اول وچ موجود اے۔ 2022 دے تباہ کن سیلاب دوران پاکستان دا دورہ اُنہاں لئی ہمیشہ یادگار رہے گا۔
انتونیو گوتریس نے فارن سروسز اکیڈمی وچ تقریب نوں خطاب کردیاں امریکا تے ایران دے وچکار امن قائم کرن وچ مدد لئی پاکستان دیاں کوششاں نوں سراہیا تے آکھیا کہ گہری تے پیچیدہ جغرافیائی سیاسی کشیدگی دے ایس دور وچ اسلام آباد مکالمے تے کشیدگی گھٹاؤن لئی اک اہم مرکز دے طور اُتے اُبھریا اے۔
انتونیو گوتریس نے آکھیا کہ اُنہاں مزاحمت تے حوصلے والا اوہ پاکستان وی ویکھیا جس نے دہشت گردی دے چیلنجاں دا سامنا کیتا۔ پاکستان خود دنیا دے اوہناں ملکاں وچ شامل اے جو دہشت گردی توں سب توں زیادہ متاثر ہوئے نیں۔
اُنہاں آکھیا کہ مصنوعی ذہانت دی حکمرانی دے نظام نوں پوری انسانیت دے مفاداں دی عکاسی کرنی چاہیدی اے تے ایس دے فائدے وسیع پیمانے اُتے ساریاں تک پہنچنے چاہیدے نیں۔
دریں اثنا بیلاروس دی سکیورٹی کونسل دے ریاستی سیکرٹری دی قیادت وچ اعلیٰ سطحی وفد نے جی ایچ کیو راولپنڈی وچ فیلڈ مارشل سید عاصم منیر نال ملاقات کیتی۔
ملاقات وچ بدل دی علاقائی تے عالمی سکیورٹی صورتحال، باہمی دلچسپی دے امور تے دوطرفہ دفاعی تعاون دے موجودہ دائرہ کار اُتے تبادلہ خیال کیتا گیا۔
چیف آف ڈیفنس فورسز نے جمہوریہ بیلاروس نال دفاعی تے سکیورٹی تعاون نوں ہور گہرا کرن دی پاکستان دی خواہش دا اعادہ کیتا۔
لیفٹیننٹ جنرل الیگزینڈر نے دفاعی تے سکیورٹی تعاون نوں ہور مضبوط بناؤن دی خواہش دا اظہار کیتا تے علاقائی امن تے استحکام دے فروغ وچ پاکستان دے کردار نوں وی سراہیا۔
