10 لکھ گھر بناؤن چاہنی آں پر معاشی رکاوٹاں حائل نیں: مریم نواز، عمانی وزیر ہاؤسنگ نال ملاقات
اپنی چھت، اپنا گھر پروگرام دے قرضے لئی سفارش دی لوڑ نئیں، 18 مہینیاں وچ 2 لکھ توں ودھ افراد نوں لون جاری ہویا، 5 سالاں وچ 5 لکھ گھر بناؤن دا ہدف پورا کراں گے: وزیراعلیٰ، وزیر ہاؤسنگ نے پراجیکٹ نوں بہترین قرار دِتا، ایوارڈ ملن اُتے مبارکباد
لاہور (نیوز ایجنسیاں) وزیراعلیٰ پنجاب مریم نواز شریف نے مسقط وچ عمانی وزیر برائے ہاؤسنگ، اربن پلاننگ ڈاکٹر خلفان بن سعید بن مبارک الشویلی نال ملاقات کیتی۔
عمانی وزیر خلفان بن سعید بن مبارک الشویلی نے وزیراعلیٰ مریم نواز شریف تے وفد دا پرتپاک خیرمقدم کیتا تے ایو این ہیبی ٹیٹ سکرول آف آنر ایوارڈ ملن اُتے مبارکباد دِتی۔
عمانی وزیر ہاؤسنگ، اربن پلاننگ ڈاکٹر خلفان الشویلی نے پنجاب دے ’’اپنی چھت، اپنا گھر‘‘ پراجیکٹ وچ گہری دلچسپی دا اظہار کیتا۔
وزیراعلیٰ مریم نواز شریف نے پنجاب دے لینڈ مارک ہاؤسنگ پراجیکٹ ’’اپنی چھت، اپنا گھر‘‘ نوں غیرمعمولی پذیرائی ملن اُتے شکریہ ادا کیتا۔ ملاقات وچ اربن پلاننگ تے ڈویلپمنٹ نال متعلق امور اُتے تفصیلی تبادلہ خیال کیتا گیا۔
وزیراعلیٰ مریم نواز شریف نے عمانی وفد نوں پنجاب دے ’’اپنی چھت، اپنا گھر‘‘ پروگرام دیاں تفصیلات توں آگاہ کیتا تے سوالاں دے جواب دِتے۔
وزیراعلیٰ نے ’’اپنا کھیت، اپنا روزگار‘‘، ’’اپنی زمین، اپنا گھر‘‘ تے ’’اپنی چھت، محفوظ چھت‘‘ پراجیکٹاں بارے وی تفصیلات دسدیاں آکھیا کہ صرف 18 مہینیاں وچ ’’اپنی چھت، اپنا گھر‘‘ لئی گھر بناؤن واسطے 2 لکھ توں ودھ افراد نوں لون جاری ہونا غیرمعمولی گل اے۔
’’اپنی چھت، اپنا گھر‘‘ لئی 260 ارب روپے دے بلاسود قرضے نہ صرف جاری ہو چکے نیں بلکہ قسطاں دی وصولی وی شروع ہو گئی اے۔ ’’اپنی چھت، اپنا گھر‘‘ دے تحت سوا لکھ توں ودھ خاندان اپنے گھراں وچ منتقل ہو چکے نیں۔
میرٹ تے شفافیت ’’اپنی چھت، اپنا گھر‘‘ پروگرام دی انفرادیت اے، بلاسود لون لئی کسے سفارش دی لوڑ نئیں۔
مریم نواز نے آکھیا کہ ’’اپنی چھت، اپنا گھر‘‘ دے تحت 10 لکھ گھر بناؤن چاہنی آں، پر معاشی رکاوٹاں حائل نیں۔ 5 سالاں وچ گھٹ آمدن والے لوکاں لئی 5 لکھ گھر بناؤن دا ہدف پورا کراں گے۔
’’اپنی چھت، اپنا گھر‘‘ پراجیکٹ وچ صرف 14 ہزار روپے دی آسان قسط دی وجہ توں ریکوری ریٹ 99 فیصد توں ودھ اے۔
پنجاب سوشل اکنامک رجسٹری دے تحت پورے صوبے دا مکمل ڈیٹا مرتب کیتا گیا اے، ایس ڈیٹے دی مدد نال گھراں دی ضرورت دا تعین کیتا جاندا اے۔ ’’اپنی چھت، اپنا گھر‘‘ دے ہر مکان وچ دل نوں چھو لین والی کہانی موجود اے۔
عمانی وزیر ڈاکٹر خلفان بن سعید بن مبارک الشویلی نے آکھیا کہ عمان وچ مقیم پاکستانیاں دی بہت وڈی کمیونٹی قابلِ قدر خدمات سرانجام دے رہی اے۔ عمان ہر پاکستانی دی طرح وزیراعلیٰ مریم نواز لئی وی دوجے گھر وانگ اے۔
اوہناں آکھیا کہ عمان وچ ہاؤسنگ لون دے دو ماڈل نیں، ہزار ڈالر توں گھٹ آمدن اُتے ہاؤسنگ گرانٹ دِتی جاندی اے۔ عمان ہاؤسنگ بینک دے ذریعے لون دِتے جاندے نیں، پر ’’اپنی چھت، اپنا گھر‘‘ بلاسود ہون دی وجہ توں زیادہ بہتر پراجیکٹ اے۔
اوہناں آکھیا کہ پاکستانی کمپنیاں مسقط دے رئیل اسٹیٹ کاروبار وچ قابلِ قدر خدمات سرانجام دے رہیاں نیں۔
دریں اثنا وزیراعلیٰ نے شمالی وزیرستان وچ فتنہ الہندوستان دے 13 خوارج نوں ہلاک کرن اُتے سکیورٹی فورسز نوں شاباش دِتی تے آکھیا کہ افواج پاکستان ہر محاذ اُتے دشمن لئی سیسہ پلائی دیوار وانگ نیں۔
