خطے دے 48 فیصد غریب پاکستانی، روزانہ آمدن 850 روپے توں وی گھٹ: عالمی بینک
غربت دی شرح وچ 6.4 فیصد اضافہ ہویا، رواں مالی سال مجموعی ملکی پیداوار دی شرح نمو 2.2 فیصد رہوے گی، 2022 دے سیلاب، کورونا وبا نے صورتحال نوں ہور متاثر کیتا، خلیج توں آون والی ترسیلات زر وی گھٹ: رپورٹ
اسلام آباد عالمی بینک دی غربت نال متعلق حالیہ رپورٹ وچ انکشاف کیتا گیا اے کہ مشرق وسطیٰ، شمالی افریقہ، افغانستان تے پاکستان اُتے مشتمل مینا خطے دے 48 فیصد غریب افراد پاکستان وچ رہندے نیں۔ ایہناں افراد دی روزانہ آمدنی غربت دی مقررہ حد 3 ڈالر، یعنی تقریباً 840 روپے توں وی گھٹ اے۔
لمبے عرصے توں جاری معاشی اصلاحات دے نتیجے وچ حقیقی گھریلو آمدنی وچ کمی واقع ہوئی، جس نال نہ صرف ملک وچ غربت وچ اضافہ ہویا بلکہ روزگار دے مواقع وی گھٹ گئے۔ 2018-19 توں 2024-25 دے دوران 3 ڈالر روزانہ آمدنی دی سطح اُتے پاکستان وچ غربت دی شرح وچ 6.4 فیصد اضافہ ہویا، جدوں کہ 4.2 ڈالر روزانہ آمدنی دی سطح اُتے ایہ اضافہ 3.2 فیصد ریکارڈ کیتا گیا۔
عالمی بینک دا اندازہ اے کہ رواں مالی سال پاکستان دی مجموعی ملکی پیداوار دی شرح نمو 2.2 فیصد رہوے گی، جیہڑی پچھلے سال دی شرح دے تقریباً برابر اے۔ رپورٹ وچ آکھیا گیا اے کہ پاکستان نوں مسلسل کئی منفی معاشی جھٹکیاں دا سامنا کرنا پیا، جنہاں وچ کورونا وبا، 2022 دے تباہ کن سیلاب، معاشی بحران، ہوشربا مہنگائی تے روپے دی قدر وچ کمی شامل اے۔
رپورٹ دے مطابق علاقائی سطح اُتے غربت وچ اضافہ بنیادی طور اُتے پاکستان وچ غربت ودھن دے باعث ہویا۔ مشرق وسطیٰ دے تنازع دے معاشی اثرات دا ذکر کردیاں عالمی بینک نے آکھیا کہ تنازع شروع ہون توں بعد پاکستان تے لبنان وچ پٹرول دیاں قیمتاں وچ 40 فیصد اضافہ ہویا، جدوں کہ شام تے متحدہ عرب امارات وچ وی قیمتاں ودھیاں۔
پاکستان وچ ڈیزل دی قیمت وچ 40 فیصد توں ودھ اضافہ ہویا، جدوں کہ لبنان وچ 80 فیصد تے متحدہ عرب امارات وچ 70 فیصد تک اضافہ ریکارڈ کیتا گیا۔ پاکستان، مراکش، تیونس، جبوتی، مصر تے اردن ورگے تیل درآمد کرن والے ملکاں نوں مختلف معاشی چیلنجز دا سامنا اے۔
تیل تے ضروری اشیا دیاں قیمتاں وچ اضافے نال مہنگائی ودھ رہی اے، جس دے باعث مالیاتی گنجائش گھٹ رہی اے۔ خلیجی معیشتاں توں آون والی ترسیلات زر وچ وی کمی ہوئی اے، جدوں کہ قرض لین دی لاگت تے خطرات دے باعث بیمہ اخراجات وچ اضافہ ہویا اے۔
رپورٹ وچ آکھیا گیا اے کہ پاکستان دے نجی شعبے نے ہن تک ابھردیاں معاشی ضرورتاں دے مطابق اپنے آپ نوں پوری طرح نئیں ڈھالیا۔
