پنجاب لئی عالمی اعزاز اُتے خوش ہونا چاہیدا اے: عظمیٰ بخاری
جیہڑے 14 سالاں توں دھرنیاں اُتے لگے نیں، ہُن اُنہاں نوں کوئی فیض نہیں ملنا: وزیر اطلاعات
لاہور (سٹاف رپورٹر) وزیر اطلاعات تے ثقافت پنجاب عظمیٰ بخاری نے آکھیا اے کہ مریم نواز نوں کٹیاں تے وچھیاں اُتے ایوارڈ نہیں ملیا، پاکستان نوں عالمی اعزاز ملن اُتے فخر کرنا چاہیدا اے۔ پنجاب دے منصوبے نوں اقوامِ متحدہ نے وی تسلیم کیتا اے، ایس توں پہلاں ایہ ایوارڈ کسے نوں نہیں ملیا۔
دوجی واری 9 مئی نوں کسے صورت برداشت نہیں کیتا جاوے گا۔ جیہڑے 14 سالاں توں دھرنیاں اُتے لگے ہوئے نیں، ہُن اُنہاں نوں کوئی فیض نہیں ملنا۔ ’اپنی چھت اپنا گھر‘ وزیراعلیٰ پنجاب دا فلیگ شپ منصوبہ اے، پنج سالاں وچ 10 لاکھ گھر بناون دا ہدف اے۔ 2 لاکھ 30 ہزار لوکاں نوں اپنی چھت ملی اے، بلاسود قرضیاں دے ذریعے عام بندے نوں بااختیار بنایا جا رہیا اے۔
اِنہاں خیالات دا اظہار اُنہاں ڈی جی پی آر وچ وزیر ہاؤسنگ بلال یاسین دے نال اک اہم پریس کانفرنس کردیاں کیتا۔ اُنہاں آکھیا کہ ایس منصوبے دے ذریعے مستحق خاندانوں نوں صرف مالی مدد ای نہیں، بلکہ اپنی چھت تے باعزت زندگی گزارن دا موقع وی مل رہیا اے۔
عظمیٰ بخاری نے آکھیا کہ صحافی دا کم مکمل خبر عوام تک پہنچانا اے، کسے دی تضحیک کرکے یا حقائق نوں نظرانداز کرکے خبر بنانا صحافت نہیں۔ اُنہاں آکھیا کہ اوہ اپنے ہر اقدام تے بیان دی جواب دہ نیں تے کسے دے خلاف ذاتی مہم چلانا اُنہاں دا طریقہ نہیں۔
پاکستان تے پنجاب نوں ملن والے عالمی اعزاز اُتے سیاسی اختلافات توں بالاتر ہو کے خوش ہونا چاہیدا اے۔
