فیلڈز توں گیس مقامی آبادی دا حق، محروم نہیں رکھیا جا سکدا: سینیٹ کمیٹی
کمپنیاں نوں ساریاں گیسفکیشن سکیمیں اُتے مقررہ مدت دے اندر کم مکمل کرن دی ہدایت
اسلام آباد (نامہ نگار) سینیٹ دی قائمہ کمیٹی برائے پٹرولیم دی ذیلی کمیٹی نے ملک بھر وچ گیس فیلڈز دے پنج کلومیٹر دے دائرے وچ واقع پنڈاں نوں گیس فراہم کرن دی پالیسی اُتے عملدرآمد وچ تاخیر اُتے تشویش دا اظہار کردیاں وزارتِ پٹرولیم تے سوئی سدرن گیس کمپنی (ایس ایس جی سی) نوں ساریاں اہل گیسفکیشن سکیمیں اُتے مقررہ مدت دے اندر کم مکمل کرن دی ہدایت کر دِتی۔
ذیلی کمیٹی نے آکھیا کہ گیس فیلڈز دے نیڑے رہن والی مقامی آبادی نوں گیس دی فراہمی اوہناں دا حق اے، انہاں نوں جائز حق توں ہور محروم نہیں رکھیا جا سکدا۔ کمیٹی دا اجلاس کنوینر جام سیف اللہ خان دی صدارت وچ پارلیمنٹ ہاؤس وچ ہویا۔
کنوینر کمیٹی نے آکھیا کہ وزیراعظم تے سپریم کورٹ ولوں دِتیاں ہدایات اُتے عملدرآمد وچ ہور تاخیر نہیں ہونی چاہیدی۔ کمیٹی نے گھوٹکی قادرپور روڈ دی تعمیر تے مرمت دی سفارش وی کیتی۔ کمیٹی نے او جی ڈی سی ایل ولوں کڈھی جاندی گیس تے کارپوریٹ سماجی ذمہ داری دے تحت انہاں علاقیاں وچ فراہم کیتی جاندی گیس دیاں تفصیلاں وی طلب کر لئیاں۔
