پمز اصلاحاتی کمیٹی دا اجلاس، شفاف گورننس فریم ورک دی تشکیل اُتے زور
اسلام آباد (نیوز رپورٹر) وزیراعظم ولوں پمز دیاں انتظامی تے طبی اصلاحات لئی بنائی گئی کمیٹی دا پہلا اجلاس گزشتہ روز ہویا۔ اجلاس دی صدارت وزیرِ صحت مصطفیٰ کمال نے کیتی۔
وزیرِ قانون اعظم نذیر تارڑ تے سیکرٹری اسٹیبلشمنٹ بیرسٹر نبیل اعوان نے وی شرکت کیتی۔ کمیٹی نے ہسپتال وچ مریضاں دی حفاظت، طبی سہولتاں دی فراہمی تے انفراسٹرکچر دی بہتری لئی مختلف اصلاحاتی تجاویز اُتے غور کیتا۔ کمیٹی نے پائیدار تنظیمِ نو تے شفاف گورننس فریم ورک دی تشکیل اُتے زور دِتا۔
اصلاحاتی کمیٹی نے ایس گل اُتے اتفاق کیتا کہ پمز وچ کیتیاں جان والیاں ساریاں تبدیلیاں لئی اک واضح تے قابلِ عمل قانونی بنیاد فراہم کیتی جائے گی تے اصلاحات نوں عملی شکل دین توں پہلاں انہاں قوانین، قواعد و ضوابط تے اختیارات دا حتمی تعین کیتا جائے گا جنہاں دے تحت ایہ ساریاں انتظامی تے طبی تبدیلیاں نافذ کیتیاں جان گیاں۔
