بحرین دے وزیرِ خارجہ دیاں صدر، وزیراعظم تے فیلڈ مارشل نال ملاقاتاں مشترکہ وزارتی کمیشن دے اجلاس دے معاہدے اُتے دستخط

معاشی رابطیاں نوں فروغ دیو: زرداری، تجارت تے سرمایہ کاری دی صلاحیت ودھاؤ: شہباز شریف، دفاعی تعاون مضبوط بنایا جائے گا: عاصم منیر

مشترکہ وزارتی کمیشن دا اجلاس 5 سال دے وقفے نال نئیں، بلکہ 365 دناں دے اندر ہووے گا: اسحاق ڈار، 15 شعبیاں وچ تعاون اُتے گل بات ہوئی: الزیانی

اسلام آباد 4— بحرین دے وزیرِ خارجہ ڈاکٹر عبداللطیف بن راشد الزیانی نے صدر آصف علی زرداری، وزیراعظم شہباز شریف، نائب وزیراعظم اسحاق ڈار تے فیلڈ مارشل عاصم منیر نال ملاقاتاں کیتیاں تے مشترکہ وزارتی کمیشن دے تیجے اجلاس دے معاہدے اُتے دستخط کیتے۔ ایس موقعے اُتے مختلف شعبیاں وچ تعاون ودھاؤن اُتے اتفاق ہویا۔

صدر زرداری نے آکھیا کہ پاکستان بحرین نال آپنے دیرینہ تعلقات نوں خصوصی اہمیت دیندا اے تے دوناں ملکاں دے درمیان تجارت، سرمایہ کاری، معاشی رابطیاں تے سکیورٹی دے شعبیاں وچ تعاون نوں ہور وسعت دینا چاہندا اے۔ اُنہاں نے غذائی تحفظ، انفارمیشن ٹیکنالوجی، ڈیجیٹل خدمات، تعمیرات، کان کنی، بندرگاہاں نال متعلق معاملات، تحقیق تے ترقی، سیاحت تے صحت دے شعبیاں وچ تعاون دے امکانات اُجاگر کیتے۔

بحرین دے وزیرِ خارجہ ڈاکٹر عبداللطیف بن راشد الزیانی نے صدر مملکت نوں بحرین دے فرمانروا شاہ حمد بن عیسیٰ آل خلیفہ تے ولی عہد تے وزیراعظم سلمان بن حمد آل خلیفہ ولوں نیک خواہشات پہنچائیاں۔

علاقائی صورتحال اُتے گل بات کردیاں ڈاکٹر عبداللطیف الزیانی نے پاکستان ولوں تنازعات دے فریقین نوں مذاکرات دی میز اُتے لیاؤن تے کشیدگی گھٹاؤن دیاں کوششاں دی تعریف کیتی۔ اُنہاں آکھیا کہ پاکستان دیاں سفارتی کوششاں نال کئی قیمتی جاناں بچاؤن وچ مدد ملی۔

شہباز شریف دی تجارت تے سرمایہ کاری ودھاؤن اُتے زور

وزیراعظم شہباز شریف نے بحرین دے وزیرِ خارجہ دا خیرمقدم کردیاں آکھیا کہ دوناں ملکاں دے تعلقات سانجھیاں قدراں، باہمی اعتماد تے عوامی رابطیاں اُتے قائم نیں۔

اُنہاں نے دوطرفہ تعلقات وچ مثبت پیش رفت اُتے اطمینان دا اظہار کیتا تے تجارت، سرمایہ کاری، توانائی تے افرادی قوت دی صلاحیت ودھاؤن سمیت مختلف شعبیاں وچ تعاون ہور مضبوط کرن دے پاکستان دے عزم دا اعادہ کیتا۔

وزیرِ خارجہ عبداللطیف الزیانی نے بحرین دی قیادت ولوں وزیراعظم لئی نیک خواہشات تے خیرسگالی دا پیغام پہنچایا۔ اُنہاں نے باہمی مفاد دے مختلف شعبیاں وچ دوطرفہ تعاون ہور مضبوط کرن دے بحرین دے عزم دا وی اعادہ کیتا۔

ملاقات دوران دوناں پاسیاں ولوں علاقائی تے عالمی صورتحال اُتے تبادلۂ خیال کیتا گیا۔ باہمی دلچسپی دے معاملات اُتے مسلسل مشاورت تے رابطہ برقرار رکھن دی اہمیت اُتے وی زور دتا گیا۔

وزیرِ خارجہ عبداللطیف الزیانی نے خطے وچ امن تے استحکام دے فروغ لئی پاکستان دے تعمیری کردار تے ثالثی دیاں کوششاں دی تعریف کیتی۔

وزیراعظم نے امید ظاہر کیتی کہ پاکستان تے بحرین دے مشترکہ وزارتی کمیشن دا تیسرا اجلاس دوناں ملکاں دے درمیان تعاون نوں ہور فروغ دین تے باہمی تعلقات مضبوط کرن وچ اہم کردار ادا کرے گا۔ ملاقات خوشگوار تے دوستانہ ماحول وچ ہوئی، جیہڑی پاکستان تے بحرین دے قریبی تے دیرینہ برادرانہ تعلقات دی عکاسی کردی اے۔

پاکستان تے بحرین دفاعی تعاون مضبوط بناؤن اُتے متفق

ایس توں علاوہ بحرین دے وزیرِ خارجہ نے چیف آف ڈیفنس فورسز فیلڈ مارشل سید عاصم منیر نال جی ایچ کیو وچ ملاقات کیتی۔

پاک فوج دے شعبہ تعلقاتِ عامہ (آئی ایس پی آر) دے مطابق، ملاقات وچ باہمی دلچسپی دے معاملات، علاقائی سکیورٹی دی صورتحال تے پاکستان تے بحرین دے درمیان دوطرفہ دفاعی تے سکیورٹی تعاون اُتے تبادلۂ خیال ہویا۔

فیلڈ مارشل سید عاصم منیر نے پاکستان تے بحرین دے دیرینہ برادرانہ تعلقات دا ذکر کردیاں آکھیا کہ دوناں ملکاں دے تعلقات سانجھیاں قدراں تے باہمی احترام اُتے مبنی نیں۔

فیلڈ مارشل نے دفاع تے سکیورٹی سمیت مختلف شعبیاں وچ دوطرفہ تعاون ہور مضبوط کرن لئی پاکستان دے عزم دا اعادہ کیتا۔

بحرین دے وزیرِ خارجہ نے پاکستان دیاں مسلح افواج دی پیشہ ورانہ صلاحیتاں تے آپریشنل تیاری دی تعریف کیتی تے دوطرفہ تعاون نوں ہور فروغ دین دے عزم دا اظہار کیتا۔ ڈاکٹر عبداللطیف بن راشد الزیانی نے علاقائی امن تے استحکام لئی پاکستان دیاں کوششاں تے کردار نوں وی سراہیا۔

مشترکہ وزارتی کمیشن دے اجلاس دے معاہدے اُتے دستخط

ایس توں پہلاں نائب وزیراعظم تے وزیرِ خارجہ اسحاق ڈار تے بحرین دے وزیرِ خارجہ ڈاکٹر عبداللطیف بن راشد الزیانی نے پاکستان تے بحرین دے مشترکہ وزارتی کمیشن دے تیجے اجلاس دے معاہدے اُتے دستخط کیتے۔

تجارت، سرمایہ کاری، زراعت، غذائی تحفظ، تیل، گیس تے معدنیات دے شعبیاں وچ تعاون اُتے اتفاق ہویا۔ بحری امور، انفارمیشن ٹیکنالوجی، صحت، تعلیم تے افرادی قوت دے شعبیاں وچ وی باہمی تعاون ودھاؤن دا فیصلہ کیتا گیا۔

دوطرفہ تجارت تے سرمایہ کاری لئی حکومتی سطح اُتے مشترکہ ورکنگ گروپ قائم کرن دا فیصلہ ہویا اے۔ ایہ گروپ تجارت تے سرمایہ کاری دے معاملات اُتے مشاورت لئی ادارہ جاتی طریقۂ کار فراہم کرے گا۔

اجلاس دے اختتام اُتے مشترکہ پریس کانفرنس کردیاں اسحاق ڈار نے آکھیا کہ پاکستان تے بحرین نے تجارت تے سرمایہ کاری، صنعتی تعاون، زراعت تے غذائی تحفظ، ہنرمندی، اعلیٰ تعلیم، انفارمیشن ٹیکنالوجی، لاجسٹکس تے بحری امور سمیت مختلف شعبیاں وچ دوطرفہ تعاون ہور مضبوط کرن اُتے اتفاق کیتا اے۔

دونوں ملکاں نے خلیج تعاون کونسل (جی سی سی) تے پاکستان دے درمیان آزاد تجارتی معاہدے نوں حتمی شکل دین دے عزم دا وی اظہار کیتا اے۔

اسحاق ڈار نے آکھیا کہ مشترکہ وزارتی کمیشن دے تیجے اجلاس دا پروٹوکول طے پا گیا اے، جیہڑا باہمی دلچسپی دے شعبیاں وچ تعاون نوں ہور مضبوط تے وسیع کرن دے سانجھے عزم دی عکاسی کردا اے۔

اجلاس دا اک اہم نتیجہ کئی مشترکہ ورکنگ گروپس نوں فعال بنانا اے، جیہڑے باقاعدہ رابطے تے مشترکہ وزارتی کمیشن دے فیصلےآں اُتے مؤثر عمل درآمد یقینی بناؤن وچ مدد دین گے۔

اجلاس دوران خلیج دی بدل دی صورتحال اُتے وی گل بات ہوئی تے مسلسل کشیدگی گھٹاؤن، مذاکرات تے سفارت کاری دی اہمیت اُتے زور دتا گیا۔

اسحاق ڈار نے آکھیا کہ آبنائے ہرمز تے باب المندب دے ذریعے محفوظ تے آزادانہ آمدورفت یقینی بنانا ضروری اے، کیوں جو ایہ آبی راستے علاقائی تے عالمی غذائی تحفظ تے توانائی دی سلامتی لئی بڑی اہمیت رکھدے نیں۔

اُنہاں آکھیا کہ پاکستان نے ایس ضرورت اُتے زور دتا اے کہ افغان سرزمین پاکستان دے خلاف استعمال نہ ہووے۔

سندھ طاس معاہدے بارے پاکستان دا مؤقف

سندھ طاس معاہدے بارے نائب وزیراعظم نے آکھیا کہ بھارت ولوں معاہدے نوں یکطرفہ طور اُتے معطل کرنا بین الاقوامی قانون دی سنگین خلاف ورزی تے سانجھے آبی وسائل نوں ہتھیار دے طور اُتے استعمال کرن دی خطرناک کوشش اے۔

اُنہاں آکھیا کہ پاکستان بحرین وچ چوتھے مشترکہ وزارتی کمیشن دے اجلاس دی میزبانی دی توقع رکھدا اے۔ ایس سلسلے وچ اتفاق کیتا گیا اے کہ اگلا اجلاس موجودہ اجلاس وانگ پنج سال دے وقفے بعد نئیں، بلکہ 2027 وچ 365 دناں دے اندر منعقد کیتا جائے گا۔

15 توں ودھ شعبیاں وچ تعاون اُتے اتفاق

بحرین دے وزیرِ خارجہ ڈاکٹر عبداللطیف بن راشد الزیانی نے آکھیا کہ پاکستان تے بحرین دے تعلقات واضح تے مخلصانہ نوعیت دے نیں۔ ہُن دوناں ملکاں دی توجہ مضبوط تعلقات نوں عملی نتیجیاں وچ بدلّن تے مستقبل وچ تعاون دے ہور مواقع لبھن اُتے اے۔

اُنہاں آکھیا کہ دوناں ملکاں نے مشترکہ وزارتی کمیشن دے تیجے اجلاس دے متفقہ منٹس اُتے دستخط کیتے نیں، جنہاں وچ 15 توں ودھ شعبیاں نوں شامل کیتا گیا اے۔

تجارت تے سرمایہ کاری لئی مشترکہ ورکنگ گروپ قائم کرن، اگلے مہینے تیل، گیس تے معدنیات نال متعلق توانائی دے مشترکہ ورکنگ گروپ دا اجلاس کراؤن تے غذائی تحفظ، انفارمیشن ٹیکنالوجی، قانون نافذ کرن والے اداریاں، میڈیا، افرادی قوت دی نقل و حرکت، صحت، تعلیم، ثقافت تے کھیل سمیت مختلف شعبیاں وچ تعاون نوں اگے ودھاؤن اُتے اتفاق ہویا اے۔

دونوں ملکاں نے جی سی سی تے پاکستان دے درمیان آزاد تجارتی معاہدے نوں حتمی شکل دین دے عزم دا وی اعادہ کیتا۔ 2027 وچ بحرین اندر ہون والے مشترکہ وزارتی کمیشن دے چوتھے اجلاس دوران ایس سلسلے وچ ہون والی پیش رفت دا جائزہ لیا جائے گا۔

ڈاکٹر عبداللطیف الزیانی نے جاری علاقائی بحران دوران پاکستان دے اصولی مؤقف دی تعریف کیتی۔ اُنہاں نے سلامتی کونسل دی قرارداد 2817 لئی پاکستان دی حمایت تے ہور شراکت داراں دے نال مل کے امریکہ تے ایران وچ مذاکرات تے کشیدگی گھٹاؤن لئی پاکستان دیاں کوششاں، جنہاں وچ اسلام آباد مذاکرات دی میزبانی وی شامل اے، نوں سراہیا۔