وزیرِاعظم دا خیبر پختونخوا دے حوالے نال ثالثی دیاں کوششاں نوں وقت دین دا فیصلہ

رانا ثنا اللہ نے مذاکراتی عمل تے فضل الرحمٰن نال ملاقات بارے بریفنگ دِتی، آئینی تے قانونی معاملے اُتے ہوم ورک مکمل

ڈیجیٹل نیشن پروگرام دا نفاذ تیز کیتا جائے، ڈیجیٹائزیشن کرپشن تے بدانتظامی دے خاتمے لئی اہم کردار ادا کردی اے: شہباز شریف

اسلام آباد (نامہ نگار، مانیٹرنگ ڈیسک) وزیرِاعظم شہباز شریف دی صدارت ہیٹھ ہوئے اجلاس وچ حکومت نے خیبر پختونخوا دے حوالے نال ثالثی دیاں کوششاں نوں ہور وقت دین دا فیصلہ کیتا اے۔ اجلاس وچ وفاقی وزیران تے اعلیٰ حکام نے شرکت کیتی، جس دوران ملک وچ امن و امان تے سیاسی صورتحال دا جائزہ لیا گیا۔

وزیرِاعظم دے مشیر رانا ثنا اللہ نے اپوزیشن نال مذاکراتی عمل، مولانا فضل الرحمٰن نال حکومتی مذاکراتی وفد دی ملاقات تے اوہدے بعد دی صورتحال بارے بریفنگ دِتی۔ ذرائع دے مطابق وفاقی حکومت نے خیبر پختونخوا دے حوالے نال سارے آئینی تے قانونی معاملے اُتے ہوم ورک مکمل کر لیا اے۔ حکومت نے کسے وی حتمی فیصلے توں پہلاں ثالثی دیاں کوششاں نوں وقت دین دا فیصلہ کیتا اے۔

دوجے پاسے وزیرِاعظم شہباز شریف نے آکھیا کہ ڈیجیٹل نیشن پاکستان پروگرام دے تحت قومی سطح اُتے مرکزی ڈیٹا سینٹر حکومتی خدمتاں تے شہری سہولتاں دی فراہمی وچ کلیدی کردار ادا کرے گا۔

ایہہ گل اوہناں وفاقی وزارتاں وچ ڈیجیٹل نیشن پاکستان پروگرام دے نفاذ اُتے پیش رفت دا جائزہ لین لئی بلائے گئے اجلاس دی صدارت کردیاں آکھی۔ وزیرِاعظم نے ہدایت کیتی کہ ساریاں وفاقی وزارتاں متعلقہ اعداد و شمار قومی ڈیجیٹل پلیٹ فارم اُتے مہیا کرن لئی ضروری اقدامات مقررہ وقت اُتے مکمل کرن۔

وفاقی وزارتاں دیاں ذمہ واریاں، کارکردگی تے متعلقہ ڈیٹا مرکزی ڈیٹا سینٹر وچ مہیا کرن نال حکومتی نظام نوں جدید دور دے تقاضیاں دے مطابق بنایا جا سکے گا۔ ڈیجیٹل نیشن پاکستان دا اصل مقصد قومی سطح اُتے شہریاں لئی مؤثر تے آسان خدمتاں دی فراہمی یقینی بنانا اے۔

وزیرِاعظم نے آکھیا کہ قومی سطح اُتے سارے شعبیاں تے حکومتی اداریاں دے کارآمد ڈیٹا دی اک تھاں فراہمی ملک دی معاشی ترقی وچ مددگار ثابت ہوندی اے۔ مستحق طبقے لئی فیول سبسڈی سکیم اُتے کامیاب عمل درآمد وچ اداریاں دے درمیان اعداد و شمار دی شراکت داری نے اہم کردار ادا کیتا۔

اوہناں آکھیا کہ وزارتاں دی کارکردگی تے متعلقہ اعداد و شمار دی ڈیجیٹائزیشن کرپشن تے ادارہ جاتی بدانتظامی دے خاتمے لئی اہم کردار ادا کردی اے۔

قومی سطح اُتے صوبائی حکومتاں دے تعاون نال یونیورسل میڈیکل ریکارڈ تیار کرن لئی وزارتِ صحت ولوں قابلِ تعریف اقدامات کیتے گئے نیں۔ وزیرِاعظم نے آکھیا کہ ملک بھر وچ معیاری ادویات دی فراہمی یقینی بناؤن لئی کیو آر کوڈ دا نفاذ وی قابلِ ستائش اے۔

بریفنگ دوران دَسیا گیا کہ وفاقی وزارتِ انفارمیشن ٹیکنالوجی متعلقہ وزارتاں دے بھرپور تعاون نال مختلف شعبیاں دی ڈیجیٹائزیشن لئی اقدامات کر رہی اے۔ عوام دی سہولت نوں مدِنظر رکھدیاں صحت، زراعت تے ہور شعبیاں وچ ڈیجیٹائزیشن دا عمل ترجیحی بنیاداں اُتے مکمل کیتا جا رہیا اے۔

وزارتِ انفارمیشن ٹیکنالوجی، وزارتِ قانون دے تعاون نال قومی قوانین نوں اک تھاں مہیا کرن لئی خصوصی تے مؤثر اقدامات کر رہی اے، تاں جو مستقبل وچ قانون سازی لئی بہتر رہنمائی حاصل ہو سکے۔

بریفنگ وچ دَسیا گیا کہ وزیرِاعظم دیاں ہدایتاں دے مطابق ترجیحی شعبیاں دی ڈیجیٹائزیشن اُتے کم جاری اے۔ ڈیجیٹل حکومتی خدمتاں، ڈیجیٹل معیشت تے ڈیجیٹل عوامی سہولتاں دے مقاصد پورے کرن لئی خصوصی اقدامات کیتے جا رہے نیں۔

اجلاس وچ مختلف وفاقی وزارتاں نے عوامی خدمتاں، کارکردگی تے متعلقہ اعداد و شمار مرکزی ڈیٹا سینٹر وچ مہیا کرن بارے بریفنگ دِتی۔ وزارتِ صحت دے متعلقہ ڈیٹا دی مرکزی ڈیٹا سینٹر وچ فراہمی تے ادویات دی معیاری تصدیق لئی ڈیجیٹائزیشن دے استعمال بارے خصوصی بریفنگ وی دِتی گئی۔

وزیرِاعظم نے ساریاں وفاقی وزارتاں نوں ہدایت کیتی کہ صوبائی حکومتاں تے متعلقہ اداریاں دے تعاون نال ڈیٹا ڈیجیٹائزیشن دا عمل مقررہ مدت دے اندر مکمل کیتا جائے۔