شمالی وزیرستان: سکیورٹی فورسز دیاں کارروائیاں، فتنۃ الخوارج دے 4 کمانڈراں سمیت 9 دہشت گرد ہلاک
پلنگ زئی، ندیم کوٹ تے کوٹ خضری وچ کارروائیاں، ہلاک ہون والے کمانڈراں وچ خارجی خالد، کامران، موسیٰ تے مفتوم شامل
اسلحہ تے گولہ بارود وی برآمد، متعدد ٹھکانے تباہ کر دتے گئے، صدر، وزیرِاعظم تے وزیرِ داخلہ ولوں سکیورٹی فورسز نوں خراجِ تحسین
راولپنڈی خیبر پختونخوا وچ فتنۃ الخوارج دے خلاف سکیورٹی فورسز دیاں بھرپور کارروائیاں جاری نیں۔ شمالی وزیرستان وچ انٹیلی جنس معلومات دی بنیاد اُتے آپریشن کردیاں فتنۃ الخوارج دے 4 اہم دہشت گرد کمانڈراں سمیت 9 خوارج ہلاک کر دتے گئے۔
سکیورٹی فورسز نے شمالی وزیرستان دے علاقے پلنگ زئی، ندیم کوٹ تے کوٹ خضری وچ کارروائیاں کیتیاں۔ ہلاک ہون والے دہشت گرد کمانڈراں وچ خارجی خالد رضا، خارجی کامران، خارجی موسیٰ تے خارجی مفتوم شامل نیں۔
ہلاک دہشت گرداں کولوں وڈی مقدار وچ اسلحہ تے گولہ بارود وی برآمد کیتا گیا، جدکہ کارروائیاں دوران فتنۃ الخوارج دے کئی ٹھکانے وی تباہ کر دتے گئے۔
صدرِ مملکت ولوں سکیورٹی فورسز نوں خراجِ تحسین
صدر آصف علی زرداری نے شمالی وزیرستان وچ کامیاب کارروائی اُتے سکیورٹی فورسز نوں خراجِ تحسین پیش کیتا۔
اپنے بیان وچ صدرِ مملکت نے آکھیا کہ چار اہم خارجی کمانڈراں سمیت 9 دہشت گرداں دا خاتمہ سکیورٹی فورسز دی پیشہ ورانہ صلاحیت تے بہادری دا ثبوت اے۔ دہشت گرداں دے غیر ملکی سرپرستاں تے مقامی سہولت کاراں دیاں سازشاں نوں ناکام بنایا جائے گا۔
آصف علی زرداری نے آکھیا کہ فتنۃ الخوارج دے خلاف عزمِ استحکام دے تحت کارروائیاں دہشت گردی دے مکمل خاتمے تک جاری رہن گیاں۔
وزیرِاعظم شہباز شریف دا سکیورٹی فورسز نوں خراجِ تحسین
وزیرِاعظم شہباز شریف نے شمالی وزیرستان وچ کامیاب کارروائی اُتے سکیورٹی فورسز دے افسراں تے اہلکاراں دی پیشہ ورانہ صلاحیتاں نوں سراہیا۔
اوہناں آکھیا کہ سکیورٹی فورسز دے افسر تے جوان دہشت گردی دے خاتمے تے ملک وچ پائیدار امن قائم کرن لئی قابلِ تعریف خدمتاں انجام دے رہے نیں۔ دہشت گرداں نوں ملک وچ بدامنی پھیلاؤن وچ کامیاب نہیں ہون دتا جائے گا۔
وزیرِ داخلہ محسن نقوی نے وی کامیاب آپریشن اُتے سکیورٹی فورسز نوں خراجِ تحسین پیش کیتا
