خیبر پختونخوا وچ ایمرجنسی یا گورنر راج؟ اج اہم اجلاس، صدرِ مملکت، وزیراعظم تے اعلیٰ عسکری حکام دی ممکنہ شرکت، اہم اختیار وفاق دے حوالے کرن دی وی تجویز
حکومت مذاکرات دی خواہشمند، پی ٹی آئی دا لچک وکھاؤن توں انکار، وکھ وکھ آئینی تے قانونی آپشنز اُتے غور، آرٹیکل 232 توں 234 تک غور و خوض توں بعد اہم فیصلے، پیپلز پارٹی دا وی گرین سگنل، قومی سلامتی دے اداریاں دیاں رپورٹس دا جائزہ لیا جائے گا، پی ٹی آئی قیادت نوں گرفتار یا نظر بند کرن دیاں تیاریاں، وزیراعلیٰ سہیل آفریدی دے خلاف حکمت عملی وی تیار کر لئی گئی: ذرائع دا دعویٰ
اسلام آباد (یاسر ملک، مانیٹرنگ ڈیسک) وفاقی حکومت نے خیبر پختونخوا دی موجودہ سکیورٹی صورتحال دے تناظر وچ اج اہم اجلاس طلب کر لیا اے۔ وزیراعظم ہاؤس وچ ہون والے ایس غیر معمولی اجلاس وچ صدرِ مملکت، وزیراعظم تے اعلیٰ عسکری حکام دی شرکت متوقع اے۔ قومی سلامتی دے اداریاں دیاں رپورٹس دا جائزہ لین توں بعد اہم فیصلے کیتے جان دا امکان اے، جدکہ پیپلز پارٹی نے وی گرین سگنل دے دتا اے۔
ذرائع دے مطابق خیبر پختونخوا حکومت دے عدم تعاون دے باعث صوبے دی موجودہ سکیورٹی صورتحال نال نمٹن لئی وفاقی حکومت مختلف آئینی تے قانونی آپشنز اُتے غور کر رہی اے۔ ذرائع دا کہنا اے کہ صوبے وچ ایمرجنسی، ایمرجنسی پلس یا گورنر راج لاگو کرن دیاں تجاویز زیرِ غور نیں۔
تحریک انصاف نال مذاکرات دی ناکامی تے لانگ مارچ اُتے اصرار توں بعد وفاقی حکومت نے سخت قدم چکن دا فیصلہ کر لیا سی، تاہم مولانا فضل الرحمان دیاں مصالحتی کوششاں نوں اک موقع دین دا فیصلہ کیتا گیا۔
ذرائع دا دعویٰ اے کہ حکومت آخری آپشن اختیار کرن توں پہلاں مذاکرات راہیں اتفاقِ رائے پیدا کرن دی خواہشمند اے، پر تحریک انصاف دی قیادت ولوں کوئی لچک نہیں وکھائی جا رہی، جدکہ وفاقی حکومت صوبے وچ امن و امان دی صورتحال نوں قابو وچ رکھن لئی اپنا آئینی کردار ادا کرنا چاہندی اے۔
ذرائع دے مطابق حکومت دے زیرِ غور تجاویز وچ ایمرجنسی، سابق فاٹا دے سارے ضلعیاں سمیت صوبے دے 12 ضلعیاں وچ ایمرجنسی پلس تے گورنر راج دا نفاذ شامل اے۔ اہم اختیار وفاق دے حوالے کرن دی تجویز وی موجود اے۔
اج دے اجلاس وچ ایس گل اُتے غور کیتا جائے گا کہ صوبے دے عوام دی جان تے مال دے تحفظ لئی وفاقی حکومت کیڑے اختیار ورت سکدی اے۔ ایس سلسلے وچ آئین دے آرٹیکل 232 توں 234 تک دے تحت دستیاب اختیاراں تے انہاں دے قانونی تقاضیاں دا جائزہ لے کے اہم فیصلے کیتے جان دا امکان اے۔
آئین دے آرٹیکل 232 دے تحت وفاقی حکومت نوں ایسی سنگین داخلی بدامنی دی صورت وچ ایمرجنسی لاگو کرن دا اختیار اے، جیہڑی صوبائی حکومت دے قابو توں باہر ہووے۔ آرٹیکل 234 اوہدوں متعلقہ ہوندا اے جدوں صوبے وچ آئینی نظام دے مطابق حکومت چلانا ممکن نہ رہے۔
حکومت نے خیبر پختونخوا وچ آئینی تے قانونی آپشنز ورتن دے معاملے اُتے پیپلز پارٹی نال مشاورت مکمل کر لئی اے۔ آئینی تے قانونی آپشنز اُتے غور دے دوران حکومتی قانونی ٹیم نوں پیپلز پارٹی دے قانونی ماہرین دا تعاون وی حاصل رہیا۔
ذرائع دے مطابق وفاقی حکومت نے اپنا طرزِ عمل نہ بدلن اُتے وزیراعلیٰ خیبر پختونخوا سہیل آفریدی دے خلاف حکمت عملی وی حتمی کر لئی اے۔ ذرائع نے دعویٰ کیتا اے کہ ملک بھر وچ پی ٹی آئی دی مرکزی قیادت نوں گرفتار یا نظر بند کرن دیاں تیاریاں شروع کر دتیاں گئیاں نیں۔
