محض شک یا الزام دی بنیاد اُتے بلیک لسٹ کرکے کاروبار بند نئیں کیتا جا سکدا: لاہور ہائی کورٹ
کسے سُنّے توں بغیر اوہدا سیلز ٹیکس نمبر بند کرنا آئین دی سنگین خلاف ورزی اے: عدالت
ٹیکسٹائل ملز دی بلیک لسٹنگ کالعدم قرار، ٹیکس فراڈ دا الزام ثابت کرن لئی ٹھوس ثبوت ضروری، دو رکنی بینچ دی ٹیکسٹائل ملز دی رجسٹریشن فوری بحال کرن دی ہدایت۔
لاہور (کورٹ رپورٹر) لاہور ہائی کورٹ دے جسٹس حسن نواز مخدوم تے جسٹس محمد اجمل زاہد اُتے مشتمل دو رکنی بینچ نے ٹیکسٹائل ملز نوں بلیک لسٹ کرن دا حکم کالعدم قرار دیندے ہوئے سیلز ٹیکس نمبر تے رجسٹریشن فوری بحال کرن دی ہدایت کر دِتی۔
عدالت نے ایف بی آر دی اپیل خارج کردیاں اپیلیٹ ٹربیونل دا فیصلہ برقرار رکھیا تے قرار دِتا کہ کسے نوں سُنّے توں بغیر اوہدا سیلز ٹیکس نمبر بند کرنا آئین دی سنگین خلاف ورزی اے۔
عدالت نے آکھیا کہ محض شک یا الزام دی بنیاد اُتے کسے شہری یا ادارے نوں بلیک لسٹ کرکے اوہدا کاروبار بند نئیں کیتا جا سکدا۔
فیصلے وچ عدالت نے واضح کیتا کہ ٹیکس فراڈ دا الزام ثابت کرن لئی ٹھوس ثبوت ضروری نیں تے ٹیکس حکام قانون دے پابند نیں۔ انہاں نوں من مانیاں کرن دی اجازت نئیں دِتی جا سکدی۔
عدالت نے آکھیا کہ سیلز ٹیکس نمبر معطل ہون دا ایہہ مطلب نئیں کہ قانونی تقاضے پورے کیتے بغیر کسے کاروبار نوں بلیک لسٹ کر دِتا جائے۔ آئین ہر شہری نوں قانون دے دائرے وچ رہندیاں کاروبار کرن دی ضمانت دیندا اے۔ محض الزامات دی بنیاد اُتے کسے شہری یا ادارے دے کاروباری حقوق متاثر نئیں کیتے جا سکدے۔
عدالت نے مزید قرار دِتا کہ انصاف حاصل کرن لئی اپیلیٹ ٹربیونل وچ نویں قانونی نکات چُکنا قانونی عمل اے۔ ہائی کورٹ اپیل دی سماعت دوران قانونی نکات دا جائزہ لے سکدی اے، تاہم حقائق دا ازسرِنو جائزہ نئیں لیا جاندا۔
