خیبر پختونخوا وچ ایمرجنسی یا گورنر راج؟ اج اہم اجلاس، صدرِ مملکت، وزیراعظم تے اعلیٰ عسکری حکام دی ممکنہ شرکت، اہم اختیار وفاق دے حوالے کرن دی تجویز وی زیرِ غور
حکومت مذاکرات دی خواہشمند، پی ٹی آئی ولوں لچک وکھاؤن توں انکار، وکھ وکھ آئینی تے قانونی آپشنز اُتے غور، آرٹیکل 232 توں 234 تک غور و خوض توں بعد اہم فیصلے، پیپلز پارٹی دا وی گرین سگنل
قومی سلامتی دے اداریاں دیاں رپورٹاں دا جائزہ لیا جاوے گا، پی ٹی آئی قیادت نوں گرفتار یا نظر بند کرن دیاں تیاریاں، وزیراعلیٰ سہیل آفریدی دے خلاف حکمت عملی وی تیار کر لئی گئی: ذرائع دا دعویٰ
اسلام آباد (یاسر ملک، مانیٹرنگ ڈیسک) وفاقی حکومت نے خیبر پختونخوا دی موجودہ سکیورٹی صورتحال دے تناظر وچ اج اہم اجلاس طلب کر لیا اے۔ وزیراعظم ہاؤس وچ ہون والے ایس غیر معمولی اجلاس وچ صدرِ مملکت، وزیراعظم تے اعلیٰ عسکری حکام دی شرکت متوقع اے۔ قومی سلامتی دے اداریاں دیاں رپورٹاں دا جائزہ لین توں بعد اہم فیصلے کیتے جان دا امکان اے، جدکہ پیپلز پارٹی نے وی گرین سگنل دے دتا اے۔
ذرائع دے مطابق، خیبر پختونخوا حکومت دے عدم تعاون دے باعث صوبے دی موجودہ سکیورٹی صورتحال نال نمٹن لئی وفاقی حکومت مختلف آئینی تے قانونی آپشنز اُتے غور کر رہی اے۔ ذرائع دا کہنا اے کہ صوبے وچ ایمرجنسی، ایمرجنسی پلس یا گورنر راج نافذ کرن دیاں تجویزاں زیرِ غور نیں۔
تحریک انصاف نال مذاکرات دی ناکامی تے لانگ مارچ اُتے اصرار توں بعد وفاقی حکومت نے سخت قدم چُکن دا فیصلہ کر لیا سی، تاہم مولانا فضل الرحمٰن دیاں مصالحتی کوششاں نوں اک موقع دین دا فیصلہ کیتا گیا۔
ذرائع دا دعویٰ اے کہ حکومت آخری آپشن اختیار کرن توں پہلاں مذاکرات راہیں اتفاقِ رائے پیدا کرنا چاہندی اے، پر تحریک انصاف دی قیادت ولوں کسے قسم دی لچک دا مظاہرہ نہیں کیتا جا ریا۔ وفاقی حکومت صوبے وچ امن و امان دی صورتحال اُتے قابو پاؤن لئی اپنا آئینی کردار ادا کرنا چاہندی اے۔
ذرائع دے مطابق، حکومت دے زیرِ غور تجویزاں وچ ایمرجنسی، سابق فاٹا دے سارے ضلعیاں سمیت صوبے دے 12 ضلعیاں وچ ایمرجنسی پلس تے گورنر راج دا نفاذ شامل اے۔ اہم اختیار وفاق دے حوالے کرن دی تجویز وی موجود اے۔
اج دے اجلاس وچ ایس گل اُتے غور کیتا جاوے گا کہ صوبے وچ عوام دی جان تے مال دی حفاظت لئی وفاقی حکومت کِہڑے اختیار استعمال کر سکدی اے۔ ایس سلسلے وچ آئین دے آرٹیکل 232 توں 234 تک دے تحت دستیاب اختیاراں تے انہاں دے قانونی تقاضیاں دا جائزہ لین توں بعد اہم فیصلے کیتے جان دا امکان اے۔
آئین دے آرٹیکل 232 دے تحت وفاقی حکومت نوں ایسی سنگین داخلی بدامنی دی صورت وچ ایمرجنسی نافذ کرن دا اختیار حاصل اے، جیہڑی صوبائی حکومت دے قابو توں باہر ہووے۔ آرٹیکل 234 اوہدوں متعلقہ ہوندا اے جدوں صوبے وچ آئینی نظام دے مطابق حکومت چلانا ممکن نہ رہے۔
حکومت نے خیبر پختونخوا وچ آئینی تے قانونی آپشنز دے استعمال بارے پیپلز پارٹی نال مشاورت مکمل کر لئی اے۔ آئینی تے قانونی آپشنز اُتے غور دوران حکومتی قانونی ٹیم نوں پیپلز پارٹی دے قانونی ماہرین دا تعاون وی حاصل رہیا۔
ذرائع دے مطابق، وفاقی حکومت نے اپنا طرزِ عمل تبدیل نہ کرن اُتے وزیراعلیٰ خیبر پختونخوا سہیل آفریدی دے خلاف حکمت عملی وی حتمی کر لئی اے۔ ذرائع نے دعویٰ کیتا اے کہ ملک بھر وچ پی ٹی آئی دی مرکزی قیادت نوں گرفتار یا نظر بند کرن دیاں تیاریاں شروع کر دتیاں گئیاں نیں۔
