سعودی عرب اُتے حوثیاں دے حملے عالمی قوانین دی کھلّی خلاف ورزی نیں: مریم نواز
سعودی عرب دی خودمختاری، علاقائی سالمیت تے سلامتی لئی غیرمتزلزل عزم دا اعادہ کردے آں: مریم نواز
وزیراعلیٰ دا پیغام: ہر دھی نوں محفوظ ماحول ملنا چاہیدا اے، دہشت گرداں خلاف کارروائی اُتے سکیورٹی فورسز نوں خراجِ تحسین
لاہور (سٹاف رپورٹر) وزیراعلیٰ پنجاب مریم نواز شریف نے حوثی ملیشیا ولوں ریاض دے شاہ خالد ایئرپورٹ اُتے حملے دی سخت مذمت کیتی اے۔ انہاں نے شاہ خالد ایئرپورٹ اُتے حملے وچ جاں بحق ہون والے افراد دے لواحقین نال دلی تعزیت دا اظہار کیتا تے آکھیا کہ زخمی ہوون والے افراد دی جلد صحت یابی لئی دعاگو آں۔
وزیراعلیٰ نے آکھیا کہ حوثیاں دے حملے بین الاقوامی قوانین دی کھلّی خلاف ورزی نیں۔ اسیں سعودی عرب دی خودمختاری، علاقائی سالمیت تے سلامتی لئی اپنے غیرمتزلزل عزم دا اعادہ کردے آں۔ پاکستانی عوام سعودی عرب دی سلامتی لئی ہر قدم اُتے نال کھڑے نیں۔
دوجے پاسے، دھیواں دے عالمی دن اُتے اپنے پیغام وچ وزیراعلیٰ پنجاب نے آکھیا کہ دھیواں اللہ تعالیٰ دی رحمت تے معاشرے دا قیمتی سرمایہ نیں۔
وزیراعلیٰ نے آکھیا کہ دھیواں نوں تعلیم، صحت، تحفظ تے ترقی دے برابر مواقع فراہم کرنا ساڈے ساریاں دی سانجھی ذمہ داری اے۔ دھیواں نوں بااختیار بنا کے ہی اک مضبوط، خوشحال تے ترقی یافتہ معاشرے دی بنیاد رکھی جا سکدی اے۔ بچیاں دے حقاں دی حفاظت، تعلیم دے فروغ تے انہاں نوں خودمختار بناؤن لئی اقدامات دی اہمیت اُجاگر کرن اُتے زور دِتا جا رہیا اے۔
انہاں آکھیا کہ ہر دھی نوں اجیہا محفوظ تے سازگار ماحول ملنا چاہیدا اے، جتھے اوہ اپنے خواب پورے کر سکے تے ملک و قوم دی ترقی وچ اپنا کردار ادا کرے۔ دھیواں دا حوصلہ، عزم تے صلاحیتاں دنیا نوں بدلّن دی طاقت رکھدیاں نیں۔ اوہ اگے ودھن، حکومت انہاں دے نال کھڑی اے۔
ساڈیاں دھیواں، بھیناں تے بچیاں قوم دا مستقبل نیں۔ دھیواں دی پرورش تے دیکھ بھال نہ صرف انہاں دا حق اے بلکہ ایہہ قومی فرض وی اے۔ دھیواں نوں تعلیم دے برابر مواقع دینا تے انہاں دے روشن مستقبل نوں یقینی بنانا ساڈیاں ترجیحات وچ شامل اے۔
اس توں علاوہ وزیراعلیٰ پنجاب نے ضلع کرم وچ سرحدی دراندازی ناکام بناؤن تے 12 دہشت گرداں نوں ہلاک کرن اُتے سکیورٹی فورسز نوں خراجِ تحسین پیش کیتا۔ انہاں نے دہشت گرداں خلاف کارروائی دوران شہید ہون والے نائب صوبیدار ہدایت امان نوں خراجِ عقیدت پیش کیتا تے شہید دے اہلِ خانہ نال تعزیت دا اظہار کیتا۔
مزید برآں، وزیراعلیٰ پنجاب نے پنڈی گھیب وچ سلنڈر دھماکے دے نتیجے وچ 4 افراد دے جاں بحق ہون اُتے گہرے دکھ تے افسوس دا اظہار کیتا۔
