فارم 47 دے ذریعے مسلط کیتا گیا نظام بری طرح ناکام ہو چکیا اے: حافظ نعیم الرحمٰن
خیبر پختونخوا وچ گورنر راج تے ایمرجنسی مسئلیاں دا حل نہیں، صاف مطلب اے کہ حکمراناں دے اقتدار دا چراغ بجھن والا اے: امیر جماعت اسلامی
پیپلز پارٹی تے ن لیگ دی تاریخ ایسے اقدامات نال بھری پئی اے، بحران ہور گمبھیر ہووے گا: لیاقت بلوچ
لاہور، مانانوالہ امیر جماعت اسلامی پاکستان حافظ نعیم الرحمٰن نے آکھیا اے کہ خیبر پختونخوا وچ گورنر راج تے ایمرجنسی دی مخالفت کردے آں، ایہہ مسئلیاں دا حل نہیں۔ ایہہ واضح ہو گیا اے کہ فارم 47 دے ذریعے مسلط کیتا گیا نظام بری طرح ناکام ہو چکیا اے۔
امیر جماعت اسلامی پاکستان نے سوشل میڈیا ویب سائٹ ایکس اُتے جاری اپنے بیان وچ آکھیا کہ جدوں اقتدار اُتے قابض قوتاں گورنر راج تے ایمرجنسی دے ذریعے حکومت چلاؤن دی کوشش کرن، تے صاف مطلب اے کہ انہاں دی حکومت دا چراغ بجھن والا اے۔
سیاسی مسئلیاں دا حل ایسے اقدامات دی بجائے جمہوری اصولاں تے سیاسی عمل دے ذریعے لبھیا جانا چاہیدا اے۔ پاکستان ڈیموکریٹک موومنٹ (پی ڈی ایم) وچ شامل جماعتاں نے رجیم چینج دے ویلے جیہڑا تماشا شروع کیتا سی، اج تک جمہوریت دشمنی دا ایہہ سفر جاری اے۔
حافظ نعیم الرحمٰن نے پیپلز پارٹی تے مسلم لیگ ن اُتے تنقید کردیاں آکھیا کہ انہاں دوناں جماعتاں دی تاریخ گورنر راج نافذ کرن تے عوامی مینڈیٹ تسلیم نہ کرن دے واقعات نال بھری پئی اے۔
جماعت اسلامی دے نائب امیر لیاقت بلوچ نے اپنے بیان وچ آکھیا کہ خیبر پختونخوا وچ ایمرجنسی تے گورنر راج نافذ کرنا وڈی غلطی اے، جس نال سیاسی بحران ہور گمبھیر ہووے گا۔
