لائیو سٹاک کارڈ دے دوجے مرحلے دا آغاز، مریم نواز ولوں ڈیجیٹل افتتاح

دستاویزی فلم وی پیش کیتی گئی، پہلے مرحلے وچ قرضیاں دی واپسی دی شرح 96 فیصد رہن اُتے وزیراعلیٰ دا اظہارِ مسرت

فارمرز نوں 16 ارب 20 کروڑ روپے دے قرضے ملن گے، لائیوسٹاک کارڈ نال گوشت دیاں برآمدات وچ اضافہ ہویا: بریفنگ

لاہور (نیوز ایجنسیاں) — پنجاب حکومت نے لائیوسٹاک کارڈ دے پہلے مرحلے دی کامیابی توں بعد دوجے مرحلے دا وی آغاز کر دِتا اے۔ وزیراعلیٰ مریم نواز شریف نے کارڈ استعمال کردیاں لائیوسٹاک کارڈ دے دوجے مرحلے دا ڈیجیٹل افتتاح کیتا۔ ایس موقعے اُتے محکمہ لائیوسٹاک بارے دستاویزی فلم وی پیش کیتی گئی۔

پہلے مرحلے وچ قرضیاں دی واپسی دی شرح 96 فیصد رہن اُتے وزیراعلیٰ نے خوشی دا اظہار کیتا۔

وزیر لائیوسٹاک عاشق حسین کرمانی تے سیکرٹری لائیوسٹاک احمد عزیز تارڑ نے بریفنگ دوران دسیا کہ لائیوسٹاک کارڈ دے ذریعے فارمرز نوں ہر مویشی لئی 27 ہزار روپے تک بلاسود قرضہ فراہم کیتا جائے گا۔

لائیوسٹاک کارڈ دے دوجے مرحلے تحت دو سالاں وچ 6 لاکھ مویشیاں نوں متوازن خوراک فراہم کرکے گوشت دی پیداوار ودھاؤن دا ہدف مقرر کیتا گیا اے۔ ایس مرحلے وچ فارمرز نوں مجموعی طور اُتے 16 ارب 20 کروڑ روپے دے بلاسود قرضے دِتے جان گے۔

فارمرز صرف اصل رقم واپس کرن گے، جدکہ سود پنجاب حکومت ادا کرے گی۔

لائیوسٹاک کنیکٹ پورٹل دے ذریعے 23 ہزار فارمرز نوں گوشت برآمد کرن والیاں کمپنیاں نال براہِ راست جوڑیا گیا اے۔ حکومتِ پنجاب نے گوشت دیاں برآمدات لئی اَٹھ وڈے برآمد کنندگان نال مفاہمتی یادداشتاں اُتے دستخط کیتے نیں۔

پامکو دے ذریعے چین، سعودی عرب، خلیجی ملکاں، آذربائیجان، ازبکستان تے یورپی منڈیاں وچ گوشت برآمد کرن لئی وی معاہدے کیتے گئے نیں۔

پہلی واری لائیوسٹاک کارڈ دی بدولت خواتین فارمرز دی گنتی 90 توں ودھ کے 1107 ہو گئی اے، جدکہ صوبے توں جانوراں دیاں برآمدات وچ 43 فیصد اضافہ ہویا اے۔

لائیوسٹاک کارڈ دی وجہ نال اک سال وچ پنجاب توں گوشت دیاں برآمدات وچ 9 کروڑ 60 لاکھ ڈالر دا اضافہ ریکارڈ کیتا گیا اے۔

مجموعی طور اُتے 23 ہزار 312 فارمرز لئی لائیوسٹاک کارڈ تیار کیتے گئے، جدکہ 1739 فارمرز نے 70 ہزار توں ودھ لین دین کیتے۔

لائیوسٹاک فارمرز دی رہنمائی لئی چوبی گھنٹے فعال ہیلپ لائن 080009211 وی قائم کر دِتی گئی اے۔