مکہ معاہدہ اک اہم سنگِ میل، سعودی عرب دے اپنے دفاع دے حق دی حمایت کردے آں: شہباز شریف

پاکستان سعودی عرب دی خودمختاری تے دفاع لئی شانہ بشانہ کھڑا اے، مکہ ڈیفنس الائنس دے سیکرٹری جنرل نال گل بات

قرضیاں دی فراہمی ملکی معیشت لئی ضروری اے: وزیراعظم، قیمتی پتھراں تے معدنیات دیاں برآمدات ودھاؤن دی ہدایت

اسلام آباد — وزیراعظم محمد شہباز شریف نال مکہ ڈیفنس الائنس دے پہلے سیکرٹری جنرل لیفٹیننٹ جنرل (ر) نعمان محمود نے ملاقات کیتی۔ وزیراعظم نے عہدہ سنبھالن اُتے انہاں لئی نیک خواہشات دا اظہار کیتا۔

ایس موقعے اُتے گل بات کردیاں وزیراعظم نے آکھیا کہ مکہ معاہدہ خطے وچ امن، اتحاد تے استحکام لئی اک تاریخی سنگِ میل اے۔ معاہدے دے تحت پاکستان سعودی عرب دی خودمختاری، دفاع تے علاقائی سلامتی لئی شانہ بشانہ کھڑا اے۔ پاکستان سعودی عرب دے دفاع دے جائز حق دی مکمل حمایت کردا اے۔

وزیراعظم نے آکھیا کہ پاکستان سعودی عرب دی خودمختاری، علاقائی سالمیت تے سلامتی دے تحفظ لئی اپنے غیرمتزلزل عزم دا اعادہ کردا اے۔

مکہ ڈیفنس الائنس دے سیکرٹری جنرل نے وزیراعظم نوں معاہدے دے فریم ورک تحت دفاعی تعاون نوں فروغ دین بارے حکمتِ عملی توں آگاہ کیتا۔

دوجے پاسے، وزیراعظم شہباز شریف نے وزیراعظم اپنا گھر، چھوٹے تے درمیانے درجے دے کاروباراں تے زرعی شعبے وچ قرضیاں دی فراہمی تے مالی وسائل تک رسائی بارے اجلاس دی صدارت کردیاں آکھیا کہ اپنا گھر، ایس ایم ایز تے زراعت دے شعبیاں نوں بروقت قرضے دینا ملکی معیشت نوں فروغ دین لئی ضروری اے۔

وزیراعظم نے قومی تعمیر تے ترقی لئی انہاں ترجیحی شعبیاں نوں قرضے فراہم کرن والے بینکاں دی حوصلہ افزائی کردیاں آکھیا کہ جنہاں بینکاں دی کارکردگی ہُن تک تسلی بخش نئیں، اوہ اپنی کارکردگی بہتر بناؤن تاکہ انہاں نوں وی حکومتی حوصلہ افزائی مل سکے۔

وزیراعظم نے غیر فعال پاسکو دے گوداماں تے سائلوز نوں پبلک پرائیویٹ پارٹنرشپ دے تحت چلاؤن دی ہدایت وی دِتی۔ انہاں آکھیا کہ نجی شعبے دے تعاون نال کساناں دیاں فصلّاں محفوظ طریقے نال ذخیرہ کرن دی صلاحیت ودھائی جائے۔

ایس توں علاوہ قیمتی پتھراں تے جواہرات دے شعبے دی ترقی تے برآمدات وچ اضافے لئی جائزہ اجلاس دی صدارت کردیاں وزیراعظم نے آکھیا کہ ایس شعبے دی ترقی لئی اقدامات کرنا ترجیح اے تے کسے وی قسم دی سستی برداشت نئیں کیتی جائے گی۔

قیمتی پتھراں دی کان کنی تے انہاں دی تراش خراش دے ذریعے قدر ودھاؤن لئی اک مکمل نظام تیار کیتا جائے۔

وزیراعظم نے آکھیا کہ قیمتی پتھراں دی غیر معیاری کان کنی تے سمگلنگ نال ملک نوں ہر سال ارباں ڈالر دا نقصان ہوندا اے۔ قیمتی پتھراں تے معدنیات دے وسیع ذخائراں توں برآمدات ودھاؤن لئی ترجیحی بنیاداں اُتے اقدامات کیتے جان۔

اُدھر وزیراعظم شہباز شریف نال وزیراعظم یوتھ پروگرام دے چیئرمین رانا مشہود احمد خان نے ملاقات کیتی تے انہاں نوں وزیراعظم یوتھ پروگرام دے جاری منصوبیاں بارے بریفنگ دِتی۔