پِلاک زیر اہتمام ایہناں نوں خراج تحسین پیش کرن لئی اک آن لائن تقریب منعقد ہوئی

رپورٹ : رضوان بٹ

پنجاب انسٹیٹیوٹ آف لینگوئج، آرٹ اینڈ کلچر (پِلاک)، محکمہ اطلاعات و ثقافت، پنجاب دے زیر اہتمام عظیم لوک گلوکار عالم لوہار دی 41 ویں برسی دے موقعے اُتے ایہناں نوں خراج تحسین پیش کرن لئی اک آن لائن تقریب دا انعقاد کیتا گیا جس وچ عابدہ پروین، ثریا ملتانیکر، شوکت علی، عطاء اللہ خان عیسیٰ خیلوی، عارف لوہار، مشرقی پنجاب توں ہربھجن مان، پمی بائی تے گُر بجھن گِل توں علاوہ راحت ملتانیکر، ندیم عباس لونے ولا، مدثر اقبال بٹ، سجاد بری، خیبر پختونخواہ توں فیاض خان خیشگی، بلوچستان توں شفقت عاصمی تے مسعود نبی بلوچ دے نال نال ڈاکٹر صغرا صدف ڈائریکٹر جنرل، پِلاک ، محمد عاصم چودھری ڈائریکٹر پِلاک، شفاعت عباس اسسٹنٹ ڈائریکٹر، امانت علی تے حسن جلیل پروڈیوسر ایف ایم ۹۵ پنجاب رنگ نے وی شرکت کیتی۔
تقریب دے آغاز وچ ڈاکٹر صغرا صدف نے عظیم لوک گلوکار نوں خراج عقیدت پیش کردے ہوئے کہیا کہ عالم لوہار پنجاب دی لوک موسیقی دا اوہ درخشندہ ستارہ اے جس دی لَو چار دہائیاں لنگھن توں بعد وی نہیں گھٹے گی تے ایہناں دے پتر عارف لوہار نے اپنے پیو دے مشن نوں جاری رکھ کے پنجاب دی ثقافت اُتے احسان کیتا اے۔ مشہور صوفی گلوکارہ عابدہ پروین نے عالم لوہار دی ’’جگنی‘‘ دی تعریف کردے ہوئے کہیا کہ ایہناں جہیا فنکار ایس دنیا وچ دوبارہ پیدا نہیں ہو سکداے۔ عطاء اللہ عیسیٰ خیلوی نے اظہار خیال کردے ہوئے عالم لوہار نوں اپنا استاد تے بزرگ قرار دتا تے ایہناں لئی دعائیہ کلمات ادا کیتے۔ معروف لوک گلوکار شوکت نے عالم لوہار دی شخصیت دے حوالے نال کہیا کہ اوہ اک حقیقی لوک گلوکار سن جیہڑے روح دی گہرائی نال گایا کردے سن۔ اوہناں نے تقریب وچ اپنا کلام پیش کر کے عالم لوہار نال اپنی محبت دا اظہار وی کیتا۔
مشرقی پنجاب توں مشہور پنجابی لوک گلوکار پمی بھائی نے کہیا کہ عالم لوہار دے فن نوں پوری دنیا دے پنجابی دل نال سراہندے نیں تے ایہناں دا مشہور گانا ’’بول مٹی دئیا باویا‘‘ اج وی ایہناں نوں بوہت پسند اے۔ مقبول لوک گلوکار ہر بھجن مان نے عالم لوہار دے فن دے بارے وچ اظہار خیال کردے ہوئے کہیا کہ عالم لوہار نے اپنے پچھے آن والے نویں گلوکاراں لئی اک جی ٹی روڈ یعنی سمت متعین کر دتی اے تے اج اسیں ایہناں دے نقش قدم اُتے چل کے پنجاب دی ثقافت نوں پوری دنیا وچ پیش کر رہے آں۔ اوہناں نے عالم لوہار دا اک لوک گیت وی گایا۔ مشرقی پنجاب توں معروف شاعر گُربھجن گِل نے ایس شاندار تقریب دے انعقاد اُتے پلاک دی بھرپور تعریف کیتی تے لوک موسیقی دے اینے وڈے گلوکاراں دے وچکار اپنی موجودگی نوں باعث فخر دیندے ہوئے کہیا کہ عالم لوہار نے پنجابی زبان تے پنجابی لوک موسیقی لئی جیہڑی خدمات سرانجام دتیاں نیں ایہناں نوں سراہنا چنگا عمل اے۔ اوہناں نے تجویز پیش کیتی کہ عالم لوہار دے گائے ہوئے لوک گیتاں نوں کتابی شکل وچ شائع کیتا جائے۔
پاکستان دی مشہور لوک گلوکارہ ثریا ملتانیکر نے عالم لوہار دے بارے وچ اظہار خیال کردے ہوئے کہیا کہ اوہ اک چپ رہن والے تے بوہت باادب شخصیت دے مالک سن تے ایہہ ساری خصوصیات ایہناں دے پتر عارف لوہاروچ وی پائی جاندیاں نیں۔ اوہناں نے عالم لوہار دی گائیکی دی تعریف کردے ہوئے کہیا کہ ایہناں دے گانے دا مخصوص انداز اج تیکر منفرد حیثیت دا حامل اے۔ اوہناں نے اپنا مشہور گانا ’’کیا حال سناواں دل دا‘‘ پیش کر کے شرکاء توں بے حد داد وی وصول کیتی۔ راحت ملتانیکر نے کہیا کہ عالم لوہار نے سانوں پنجاب دی ثقافت نال روشناس کرایا۔ اوہناں نے اپنی ماں دے نال مل کے ’’آ چنوں رل یار‘‘ کافی پیش کیتی۔ خیبر پختونخواہ توں معروف گلوکار فیاض خان خیشگی نے کہیا کہ عالم لوہار اپنے اچھوتے انداز دی وجہ نال نہ صرف پنجاب بلکے پورے پاکستان وچ یکساں مقبول گلوکار سن۔ بلوچستان توں شریک لوک گلوکار مسعود نبی بلوچ نے عالم لوہار نوں شہنشاہ موسیقی قرار دتا تے ایہناں دی حیاتی دے مختلف پہلوئواں اُتے وی روشنی پائی۔ کوئٹہ توں شاعر تے ادیب شفقت عاصمی نے عالم لوہار دے فن دی تعریف کردے ہوئے کہیا کہ عالم لوہار پنجاب دی ثقافت دے عکاس سن۔
پنجابی اخبار ’’بھلیکھا‘‘ دے سرپرست مدثر اقبال بٹ نے اپنی گل بات وچ کہیا کہ عالم لوہار نے برصغیر

لوک گلوکاری نوں متعارف کروایا۔ اوہناں نے داستان گوئی دے ذریعے پنجاب دی ثقافت دے نال اخلاقی قدراں دا پرچار کیتا۔ ڈائریکٹر پلاک محمد عاصم چودھری نے عالم لوہار دے فن دی تعریف کردے ہوئے کہیا کہ ایہناں دی بنائی ہوئی پنجابی نعتاں دی منفرد طرزاں اج وی ایسے طرح قائم نیں تے پنجاب دی دھرتی نال ایہناں دا گہرا عشق ایہناں دے گیتاں توں عیاں اے۔ معروف گلوکار ندیم عباس لونے والا نے کہیا کہ عالم لوہار نے لوک موسیقی وچ انج دے معیارات قائم کیتے جیہڑے بعد وچ آن والے گلوکاراں لئی مشعل راہ نیں۔ اوہناں نے اپنا مشہور گیت ’’ماڑا اے تے ماڑا سہی یار جو ہے‘‘ وی پیش کیتا۔ عارف لوہار اپنے والد دی یاداں تازہ کردے ہوئے دُکھی ہو گئے۔ اوہ اپنے پیو نال عشق کردے سن۔ اوہناں نے کہیا کہ لوک موسیقی ساڈی اصل شناخت اے کیوں جے ایس دا تعلق ساڈی روح تے دھرتی دونواں نال اے۔ ایس لئی ایس دی ترویج بوہت ضروری اے۔ عارف لوہار نے سارے گلوکاراں تے شرکاء دا شکریہ ادا کیتا۔ اوہناں نے پنجاب انسٹیٹیوٹ آف لینگوئج، آرٹ اینڈ کلچر دی ایس آن لائن تقریب دے کامیاب انعقاد اُتے بھرپور تعریف کیتی۔ تقریب دے اختتام اُتے ڈائریکٹر جنرل پلاک ڈاکٹر صغرا صدف نے تمام شرکاء دا تقریب وچ بھرپور شمولیت اُتے شکریہ ادا کردے ہوئے کہیا کہ پلِاک دی طرفوں آئندہ وی پنجابی زبان، فن تے ثقافت دے فروغ لئی ایسے طرح دیاں تقریباں دا سلسلا جاری رہے گا تے وبا توں نجات توں بعد عالم لوہار دی یاد وچ اک بھرپور لوک میلے دا اہتمام کیتا جائے گا۔