ویلے سر تے مؤثر انصاف دی فراہمی لئی پُرعزم آں: چیف جسٹس آئینی عدالت
عدالتی بالادستی، آئینی تشریح وچ مہارت تے قانون دی حکمرانی لئی عدالت اپنا کردار ادا کردی رہے گی: چیف جسٹس
جسٹس امین الدین خان نال بلوچستان بار کونسل دے وفد دی ملاقات، انصاف دی فراہمی اُتے تبادلۂ خیال
اسلام آباد (اے پی پی) چیف جسٹس وفاقی آئینی عدالت جسٹس امین الدین خان نے آکھیا اے کہ وفاقی آئینی عدالت آئینی اصولاں دے مطابق بروقت تے مؤثر انصاف دی فراہمی لئی پُرعزم اے۔ عدالتی بالادستی برقرار رکھن، آئینی تشریح وچ ادارہ جاتی مہارت یقینی بناؤن تے قانون دی حکمرانی نوں مضبوط کرن لئی عدالت اپنا آئینی کردار ادا کردی رہے گی۔
اُنہاں ایہہ گلاں بلوچستان بار کونسل دے چھ رکنی وفد نال ملاقات دوران کہیاں۔ ملاقات وچ عدالتی نظام دیاں خوبیاں، درپیش چیلنجز تے انصاف دی مؤثر فراہمی نال متعلق معاملات اُتے تبادلۂ خیال کیتا گیا۔
چیف جسٹس تے وفد نے عدالتی نظام دی کارکردگی تے شفافیت بہتر بناؤن، نالے عوامی اعتماد وچ اضافے لئی اصلاحات دی ضرورت اُتے زور دِتا۔
ایس گل اُتے وی اتفاق ہویا کہ عدلیہ تے قانونی برادری دے درمیان تعاون، ادارہ جاتی سالمیت تے آئینی نظام اُتے عوامی اعتماد نوں مضبوط بناؤن لئی مشترکہ کوششاں ضروری نیں۔
وفد وچ منیر احمد خان کاکڑ، جادین دشتی، ایاز خان مندوخیل، محمد افضل، نجیب اللہ کاکڑ تے نادر علی چلغاری شامل سن۔
