اسلام آباد پولیس دے انسپکٹراں دی بھرتی ہائی کورٹ دے فیصلے نال مشروط

سیکرٹری داخلہ، آئی جی پولیس، چیف کمشنر، پبلک سروس کمیشن تے ہوراں نوں نوٹس جاری، عدالت ولوں اٹارنی جنرل تے ایڈووکیٹ جنرل اسلام آباد نوں وی نوٹس جاری کرن دی ہدایت۔

اسلام آباد (رضوان قاضی) اسلام آباد ہائی کورٹ نے وفاقی پولیس وچ براہِ راست انسپکٹراں دی بھرتی دا عمل عدالتی فیصلے نال مشروط کردیاں آکھیا اے کہ بھرتی دا عمل کیس دے فیصلے نال مشروط ہووے گا۔ عدالت نے سیکرٹری داخلہ، آئی جی پولیس، ایڈیشنل آئی جی، چیف کمشنر، ڈپٹی سیکرٹری داخلہ تے پبلک سروس کمیشن نوں جواب لئی نوٹس جاری کر دتے۔

جسٹس ایاز شوکت نے ارشد علی تے ہور 39 سب انسپکٹراں دی درخواست اُتے سماعت دا حکمنامہ جاری کیتا، جس وچ آکھیا گیا کہ وکیل نے انسپکٹر دے عہدے اُتے براہِ راست بھرتیاں پولیس آرڈر 2002 دے آرٹیکل 7(3) دے خلاف قرار دتیاں۔

وکیل دے مطابق پولیس آرڈر 2002 اسلام آباد کیپیٹل ٹیریٹری وچ نافذ اے تے اسلام آباد ہائی کورٹ وی ایس دے نفاذ نوں تسلیم کر چکی اے۔ درخواست گزاراں دے مطابق انسپکٹر دے عہدے اُتے براہِ راست بھرتی دی قانون وچ کوئی گنجائش نہیں۔ جے بھرتی دا عمل جاری رہیا تاں قانونی طریقۂ کار دے خلاف تقرریاں ہو سکدیاں نیں۔

عدالت نے اٹارنی جنرل پاکستان تے ایڈووکیٹ جنرل اسلام آباد نوں وی نوٹس جاری کرن دی ہدایت کردیاں آکھیا کہ انسپکٹراں دی بھرتی نال متعلق درخواست اُتے اگلی سماعت 28 اکتوبر نوں ہووے گی۔