ڈار تے سعودی سفیر دی ملاقات، تعاون نوں مستحکم کرن دا عزم
راجح بن طامی البقمی ولوں پاکستانی قیادت تے عوام لئی خیرسگالی دے پیغام
سول ایوی ایشن دے منصوبے جلد مکمل کیتے جان، بنیادی ڈھانچے نوں جدید بنایا جاوے: اسحاق ڈار
اسلام آباد (وقائع نگار) نائب وزیراعظم تے وزیر خارجہ سینیٹر محمد اسحاق ڈار نال پاکستان وچ سعودی عرب دے نامزد سفیر ڈاکٹر راجح بن طامی البقمی نے اسلام آباد وچ ملاقات کیتی۔
دفتر خارجہ دے ترجمان دے مطابق، ملاقات دوران پاکستان تے سعودی عرب دے دیرینہ برادرانہ تعلقات تے سٹرٹیجک سانجھ نوں ہور مضبوط بناؤن دے معاملے اُتے گل بات ہوئی۔
اسحاق ڈار نے دوناں ملکاں وچ باہمی ترقی تے خوشحالی لئی دوطرفہ تعاون نوں ہور مضبوط کرن دے سانجھے عزم دا اعادہ کیتا۔ سعودی سفیر نے سعودی قیادت ولوں پاکستان دی قیادت تے عوام لئی خیرسگالی دے پیغام پہنچائے۔
دوجے پاسے، اسحاق ڈار نے معاشی ترقی، تجارت تے سیاحت نوں فروغ دین لئی جدید سول ایوی ایشن دے شعبے دی سٹرٹیجک اہمیت اُتے زور دتا۔ انہاں متعلقہ حکام نوں ہدایت کیتی کہ جاری منصوبے تیزی نال مکمل کیتے جان تے عالمی حفاظتی تے آپریشنل معیاراں اُتے عمل درآمد یقینی بنایا جاوے۔
دفتر خارجہ دے ترجمان دے مطابق، اسحاق ڈار دی صدارت ہیٹھ سول ایوی ایشن دے شعبے وچ پیش رفت تے اہم ترجیحات دا جائزہ لین لئی اجلاس ہویا۔ اجلاس وچ آپریشنل فریم ورک، بنیادی ڈھانچے دی بہتری تے فضائی رابطیاں نوں فروغ دین لئی کیتے جان والے اقدامات اُتے غور کیتا گیا۔
