ماحولیاتی چیلنجاں نال نمٹن لئی نویں تے اختراعی حل ضروری نیں: مصدق ملک

اسلام آباد (خصوصی رپورٹر) وفاقی وزیر برائے ماحولیاتی تبدیلی ڈاکٹر مصدق ملک نے آکھیا اے کہ پاکستان تے جرمنی نوں موسمیاتی تبدیلیاں نال نمٹن، گرین سٹارٹ اَپاں نوں فروغ دین تے پائیدار ٹیکنالوجی تیار کرن لئی تحقیق تے جدت دے شعبیاں وچ تعاون ودھانا پئے گا۔

تقریب نوں خطاب کردیاں اوہناں آکھیا کہ پاکستان جرمنی دے جدید تحقیقی نظام تے اختراعی صلاحیتاں توں فائدہ چکدے ہوئے پائیدار کاروباری موقعے پیدا کرن تے گرین سٹارٹ اَپاں نوں فروغ دین لئی اک نویں کاروباری تحریک شروع کرنا چاہندا اے۔

اوہناں آکھیا کہ پاکستان نوں سیلاباں سمیت کئی سنگین ماحولیاتی چیلنجز دا سامنا اے، جنہاں نال نمٹن لئی ایہو جیہے نویں تے اختراعی حل تیار کرنا ضروری اے، جیہڑے مقامی لوکاں دیاں لوڑاں پوری کرن دے نال نال عالمی سطح اُتے وی قابلِ عمل ہون۔

ڈاکٹر مصدق ملک نے آکھیا کہ جرمنی دے دوواں حصیاں دا دوبارہ اکٹھا ہونا عوامی عزم، محبت تے باہمی یکجہتی دی علامت اے۔ وزیراعظم پاکستان ولوں جرمنی نوں مبارک باد دیندیاں اوہناں نے جرمنی دے پُرامن اتحاد دی تعریف کیتی۔