تسی دہشت گردی ختم کرن آئے او یا پی ٹی آئی نوں؟ شوکت یوسفزئی

اسلام آباد (مانیٹرنگ ڈیسک) پاکستان تحریکِ انصاف خیبر پختونخوا دے سیکرٹری اطلاعات تے سابق صوبائی وزیر شوکت یوسفزئی نے آکھیا اے کہ اسیں ہمیشہ دہشت گردی دی مذمت کیتی اے تے دہشت گردی دے خلاف جنگ وچ اپنی فوجاں دے نال کھڑے آں۔

ٹی وی نال گل بات کردیاں شوکت یوسفزئی نے آکھیا، ”تسی دہشت گردی ختم کرن دے ناں اُتے آئے او تے پی ٹی آئی دے خلاف کریک ڈاؤن شروع کر دتا۔ تسی پی ٹی آئی ختم کرن آئے او یا دہشت گردی ختم کرن؟“ اوہناں آکھیا کہ پی ٹی آئی دے کارکنان دے خلاف کریک ڈاؤن کیتا جا ریا اے تے چادر تے چار دیواری دا تقدس پامال کیتا جا ریا اے۔

اوہناں آکھیا کہ مذاکرات پہلے وی ہو چکے نیں۔ اسیں ہمیشہ دہشت گردی دی مذمت کیتی اے تے ایس دے خلاف جنگ وچ اپنی فوجاں دے نال آں۔ ایہ الزام لایا جاندا اے کہ پولیس نوں فنڈز نئیں دتے جاندے، جدکہ خیبر پختونخوا حکومت نے بجٹ دا 2 فیصد پولیس اُتے خرچ کیتا اے۔

شوکت یوسفزئی دا کہنا سی کہ مطالبہ تاں ساڈا سی تے پُرامن احتجاج وی اسیں کر رہے ساں، پر ساڈے مطالبے اپنی تھاں اُتے ہی رہ گئے۔ پی ٹی آئی کسے وی صورت وچ دہشت گردی دی حمایت نئیں کردی۔ اوہناں آکھیا کہ ایمرجنسی لا کے پوری جماعت نوں دہشت گرداں دی حامی قرار دینا بہت غلط اے۔