بلوچستان وچ سکیورٹی فورسز دے آپریشن، فتنہ الہندوستان دے 8 دہشت گرد ہلاک، خضدار توں 18 مزدور اغوا

کوئٹہ، نوشکی تے خضدار وچ انٹیلی جنس بیسڈ آپریشن، فتنہ الہندوستان دے 8 دہشت گرد ہلاک، خضدار توں 18 مزدور اغوا

اسلحہ تے 490 کلو دھماکہ خیز مواد برآمد، دہشت گرداں دا ٹھکانہ وی تباہ، آئی ایس پی آر، صدر تے وزیراعظم ولوں سکیورٹی فورسز نوں خراجِ تحسین

نال دے علاقے وچ رات گئے دہشت گرداں نے سابق صوبائی وزیر سردار اسلم بزنجو دی ماربل فیکٹری اُتے حملہ کر دِتا، فائرنگ نال اک مزدور زخمی، 2 گاڑیاں تے اک لوڈر وی لے گئے۔

کوئٹہ، راولپنڈی (سٹاف رپورٹر، اے پی پی)

سکیورٹی فورسز نے بلوچستان دے ضلعیاں کوئٹہ، نوشکی تے خضدار وچ دہشت گرداں دی موجودگی دی اطلاع اُتے 3 انٹیلی جنس بیسڈ آپریشن کیتے۔ کارروائیاں دوران بھارتی پراکسی ’’فتنہ الہندوستان‘‘ نال وابستہ 8 دہشت گرد ہلاک کر دِتے گئے۔

آئی ایس پی آر دے مطابق ضلع کوئٹہ دے علاقے پنجپائی وچ دہشت گرداں نے مقامی ٹریفک دی روانی متاثر کرن لئی سڑک بند کرن دی کوشش کیتی، جس نوں سکیورٹی فورسز نے ناکام بنا دِتا۔ کارروائی دوران 5 بھارتی تربیت یافتہ دہشت گرد ہلاک ہوئے۔

نوشکی وچ کلیئرنس آپریشن دوران سکیورٹی فورسز نے دہشت گرداں دے ٹھکانے دا سراغ لا کے کارروائی کیتی۔ شدید فائرنگ دے تبادلے وچ 2 دہشت گرد ہلاک کر دِتے گئے، جدکہ اس دوران اسلحہ تے گولہ بارود وی برآمد ہویا۔

خضدار وچ اک ہور انٹیلی جنس بیسڈ آپریشن دوران سکیورٹی فورسز نے بروقت کارروائی کردیاں دہشت گرداں دے ٹھکانے نوں نشانہ بنایا، جس دے نتیجے وچ اک دہشت گرد ہلاک ہویا۔ کارروائی دوران 490 کلو دھماکہ خیز مواد وی برآمد کیتا گیا۔

آئی ایس پی آر دے مطابق علاقے وچ کلیئرنس آپریشن جاری نیں۔

بیان وچ آکھیا گیا کہ وفاقی ایپکس کمیٹی برائے نیشنل ایکشن پلان دی منظوری نال ’’عزمِ استحکام‘‘ دے وژن تحت سکیورٹی فورسز تے قانون نافذ کرن والے اداریاں دیاں دہشت گردی خلاف کارروائیاں پوری رفتار نال جاری رہن گیاں۔

خضدار توں 18 مزدور اغوا

دوجے پاسے دہشت گرد خضدار توں 18 مزدور اغوا کر کے لے گئے۔ بلوچستان دے ضلع خضدار دے علاقے نال وچ گزشتہ شام مسلح افراد نے اک ماربل فیکٹری اُتے حملہ کرکے اتھے کم کرن والے 18 مزدوراں نوں اغوا کر لیا۔ حملے دوران اک مزدور فائرنگ نال زخمی ہویا، جدکہ حملہ آور فیکٹری توں 2 گاڑیاں تے اک لوڈر وی اپنے نال لے گئے۔

ٹی وی دے مطابق خضدار پولیس دے اک اہلکار نے ناں ظاہر نہ کرن دی شرط اُتے تفصیلات دسدیاں آکھیا کہ ایہ واقعہ خضدار شہر توں تقریباً 40 کلومیٹر دور بیسار پہاڑی دے نیڑے پیش آیا، جتھے نیشنل پارٹی دے سابق صوبائی وزیر سردار اسلم بزنجو تے انہاں دے پتر شاہ میر بزنجو دی ماربل فیکٹری واقع اے۔

اہلکار دے مطابق ہفتے دی رات درجنوں مسلح افراد گاڑیاں تے موٹر سائیکلاں اُتے سوار ہو کے فیکٹری وچ داخل ہوئے تے اتھے موجود مزدوراں نوں زبردستی اپنے نال لے گئے۔

ایس دوران اک مزدور نے بھجن دی کوشش کیتی تاں حملہ آوراں نے اوہدے اُتے فائرنگ کر دِتی، جس نال اوہدی ٹانگ وچ گولی لگی۔

زخمی مزدور دی شناخت راشد دے ناں نال ہوئی اے۔ ابتدائی معلومات دے مطابق اغوا ہون والے مزدوراں دا تعلق خضدار دے مختلف علاقیاں نال اے۔ ہن تک کسے گروہ نے واقعے دی ذمہ داری قبول نہیں کیتی۔

یاد رہے کہ ہفتے دے روز ضلع مستونگ وچ مسلح افراد نے اک مسافر وین توں رخشان ڈویژن نال تعلق رکھن والے 20 پولیس اہلکاراں نوں اغوا کر لیا سی۔

صدر تے وزیراعظم ولوں سکیورٹی فورسز نوں خراجِ تحسین

صدر مملکت آصف علی زرداری تے وزیراعظم شہباز شریف نے دہشت گرداں دی ہلاکت اُتے سکیورٹی فورسز نوں خراجِ تحسین پیش کیتا اے۔

صدر زرداری نے بلوچستان دے ضلعیاں کوئٹہ، نوشکی تے خضدار وچ 3 مختلف انٹیلی جنس بیسڈ آپریشنز دوران بھارتی سرپرستی وچ سرگرم 8 دہشت گرداں نوں ہلاک کرن اُتے سکیورٹی فورسز دی تعریف کیتی۔

ایوانِ صدر دے میڈیا ونگ ولوں جاری بیان دے مطابق صدر آصف علی زرداری نے کوئٹہ دے علاقے پنجپائی وچ مقامی ٹریفک وچ رکاوٹ پاون دی کوشش ناکام بناؤن تے دہشت گرداں نوں ہلاک کرن اُتے سکیورٹی فورسز دیاں پیشہ ورانہ صلاحیتاں نوں سراہیا۔

انہاں آکھیا کہ دہشت گرداں دے غیر ملکی سرپرستاں تے انہاں دے مقامی سہولت کاراں دیاں سازشاں ناکام بنائیاں جان گیاں۔

ایس توں علاوہ وزیراعظم شہباز شریف نے 8 بھارتی حمایت یافتہ دہشت گرداں نوں ہلاک کرن اُتے سکیورٹی فورسز نوں خراجِ تحسین پیش کیتا۔

وزیراعظم آفس ولوں جاری بیان دے مطابق وزیراعظم نے آکھیا کہ عزمِ استحکام دے وژن تحت سکیورٹی فورسز دہشت گردی خلاف نمایاں کامیابیاں حاصل کر رہیاں نیں۔

انہاں آکھیا کہ ملک توں ہر قسم دی دہشت گردی دے مکمل خاتمے لئی پُرعزم آں۔