چھاتی دے کینسر بارے آگاہی، بروقت تشخیص تے علاج قومی ترجیح نیں: صدر تے وزیراعظم
اسلام آباد (نامہ نگار) صدر مملکت آصف علی زرداری تے وزیراعظم شہباز شریف نے چھاتی دے کینسر بارے آگاہی دے عالمی دن اُتے اپنے پیغامات وچ آکھیا کہ خواتین نوں چھاتی دے کینسر بارے آگاہی دینا، بروقت تشخیص تے علاج قومی ترجیح اے۔
اُنہاں خواتین نوں اپیل کیتی کہ اوہ بروقت تشخیص تے علاج کرواؤن تے ڈاکٹر کولوں طبی مشورہ لین وچ ہچکچاہٹ توں گریز کرن۔ صدر مملکت نے آکھیا کہ چھاتی دا کینسر ہزاراں خانداناں نوں متاثر کردا اے، ایس لئی مریضاں نوں علاج دے دوران مدد تے سہارا دینا ضروری اے۔ اُنہاں نے آگاہی پھیلاؤن، درست معلومات دی فراہمی، صحت مند طرزِ زندگی اپنان تے طبی ماہرین تے سماجی اداریاں دیاں کوششاں نوں سراہیا۔
وزیراعظم نے آکھیا کہ حکومت ابتدائی تشخیص، معیاری علاج تے سکریننگ دیاں سہولتاں ودھاؤن لئی کوششاں کر رہی اے۔ دیہی تے پسماندہ علاقیاں دیاں خواتین نوں ترجیحی بنیاداں اُتے طبی سہولتاں فراہم کرنا ضروری اے۔ اُنہاں نے لیڈی ہیلتھ ورکرز دیاں خدمتاں نوں سراہندیاں پمز وچ سکریننگ مرکز دیاں مفت تشخیصی سہولتاں دا وی ذکر کیتا۔
آصفہ بھٹو زرداری نے وی خواتین اُتے زور دتا کہ صحت بارے کسے وی تشویش دی صورت وچ مستند ڈاکٹراں نال رابطہ کرن۔ اُنہاں خاندان، میڈیا، تعلیمی اداریاں تے سول سوسائٹی نوں اپیل کیتی کہ کینسر بارے آگاہی ودھاؤن تے مریضاں دی حوصلہ افزائی کرن۔
