قلات تے گوادر وچ آپریشن، فتنہ الہندوستان دے 4 دہشت گرد ہلاک، میجر شہید
جھٹک آباد وچ دہشت گرداں دے ٹھکانے اُتے مؤثر کارروائی، 4 دہشت گرد ہلاک
مارے گئے دہشت گرداں کولوں اسلحہ تے گولہ بارود برآمد، پسنی وچ سکیورٹی فورسز دے دستے نوں آئی ای ڈی نال نشانہ بنایا گیا، شہید میجر وجاہت لاہور دے رہائشی سن۔
راولپنڈی (اے پی پی) — سکیورٹی فورسز نے بلوچستان دے ضلع قلات تے گوادر وچ مؤثر انٹیلی جنس بیسڈ آپریشنز دوران بھارتی سرپرستی وچ کم کرن والے گروہ فتنہ الہندوستان دے 4 دہشت گرداں نوں ہلاک کر دتا، جدکہ پسنی وچ آپریشن دوران دیسی ساختہ بم (آئی ای ڈی) دے دھماکے وچ دستے دی قیادت کرن والے میجر وجاہت وحید نے فرض دی راہ وچ جامِ شہادت نوش کر لیا۔
پاک فوج دے شعبۂ تعلقاتِ عامہ (آئی ایس پی آر) دے مطابق انٹیلی جنس اداریاں نوں ضلع گوادر دی تحصیل پسنی دے علاقے شادی کور تے ضلع قلات دے علاقے جھٹک آباد وچ بھارتی سرپرستی وچ کم کرن والے فتنہ الہندوستان دیاں کئی پناہ گاہاں دی موجودگی بارے اطلاع ملی سی، جنہاں توں مقامی آبادی نوں شدید خطرہ لاحق سی۔
مقامی آبادی دی حفاظت تے علاقے نوں دہشت گرداں توں پاک کرن لئی سکیورٹی فورسز انہاں علاقیاں وچ آپریشن کر رہیاں نیں۔
آئی ایس پی آر دے مطابق پہلے واقعے وچ 18 اکتوبر 2026 نوں سکیورٹی فورسز نے ضلع قلات دے عمومی علاقے جھٹک آباد وچ انٹیلی جنس دی بنیاد اُتے آپریشن کیتا۔
آپریشن دوران ساڈے جواناں نے دہشت گرداں دے ٹھکانے نوں مؤثر طریقے نال نشانہ بنایا تے شدید فائرنگ دے تبادلے توں بعد 4 دہشت گرداں نوں ہلاک کر دتا گیا۔ ایس دوران وڈی مقدار وچ اسلحہ تے گولہ بارود وی برآمد کر لیا گیا۔
دوجے واقعے وچ سکیورٹی فورسز نے ضلع گوادر دی تحصیل پسنی دے عمومی علاقے شادی کور وچ کلیئرنس آپریشن شروع کیتے۔ انہاں وچوں اک آپریشن دوران اگلی صف دے فوجی دستے نوں، جس دی قیادت لاہور دے رہائشی 34 سالہ میجر وجاہت وحید کر رہے سن، اک دیسی ساختہ بم نال نشانہ بنایا گیا۔
دھرتی دے ایس بہادر سپوت میجر وجاہت وحید نے فرض دی راہ وچ عظیم قربانی دیندے ہوئے جامِ شہادت نوش کیتا۔
علاقے وچ موجود کسے وی ہور دہشت گرد نوں ختم کرن لئی سرچ تے کلیئرنس آپریشن جاری رہن گے۔
آئی ایس پی آر نے آکھیا کہ نیشنل ایکشن پلان دی وفاقی ایپکس کمیٹی دے منظور شدہ وژن عزمِ استحکام دے تحت دہشت گردی خلاف مسلسل مہم پوری طاقت نال جاری رہے گی۔ سکیورٹی فورسز تے قانون نافذ کرن والے ادارے ملک وچوں غیر ملکی سرپرستی تے معاونت نال ہون والی دہشت گردی دی لعنت نوں جڑھوں ختم کرن لئی پُرعزم نیں۔
صدر آصف علی زرداری تے وزیراعظم شہباز شریف نے قلات تے گوادر وچ فتنہ الہندوستان دے 4 دہشت گرداں نوں ہلاک کرن اُتے سکیورٹی فورسز نوں خراجِ تحسین پیش کیتا۔ اوہناں نے شادی کور وچ میجر وجاہت دی شہادت اُتے افسوس دا اظہار کردیاں آکھیا کہ قوم نوں اپنے بہادر سپوت اُتے فخر اے۔
