معدنیات اُتے قبضے تے امریکا نوں لائسنس دین دا الزام بے بنیاد اے: عقیل ملک
فضل الرحمٰن دی سربراہی وچ مجلسِ عمل نے مشرف نوں آئین معطل رکھن دی اجازت دِتی
اسلام آباد (این این آئی، اے پی پی) وزیراعظم شہباز شریف دے معاونِ خصوصی اختیار ولی نے آکھیا اے کہ مولانا فضل الرحمٰن پی ٹی آئی دی خالی کیتی ہوئی جگہ اُتے کھیلّن دی بجائے اپنی پچ اُتے واپس آ کے کھیلّن، اسی انہاں دے نال ہوواں گے۔
وزیرِ مملکت بیرسٹر عقیل ملک دے نال پریس کانفرنس کردیاں انہاں آکھیا کہ ماضی وچ متحدہ مجلسِ عمل دے ناں نال اک اتحاد بنیا سی، جس دے سربراہ مولانا فضل الرحمٰن سن تے قاضی حسین احمد وی ایس اتحاد وچ شامل سن۔
انہاں آکھیا کہ فضل الرحمٰن دی سربراہی وچ اتحاد نے پرویز مشرف نوں وردی پائی رکھدیاں کئی سال تک آئین معطل رکھن دی اجازت دِتی۔ اوس دور وچ جیہڑیاں وی ترامیم لیاندیاں گئیاں، اوہ قومی اسمبلی توں منظور کرائیاں گئیاں تے انہاں دی توثیق وی کیتی گئی۔
انہاں آکھیا کہ خیبر پختونخوا وچ گورنر راج مجبوری تحت نافذ کیتا گیا اے۔ اسی ایس دی حمایت کردے آں تے اوہدوں تک حمایت جاری رکھاں گے، جدوں تک صوبے وچ امن بحال نہیں ہو جاندا۔
بیرسٹر عقیل ملک نے آکھیا کہ وفاق اُتے معدنیات اُتے قبضے یا امریکا سمیت کسے وی غیر ملکی طاقت نوں لائسنس دین دا الزام بالکل بے بنیاد تے جھوٹ اُتے مبنی اے۔ الزام لاؤن والے قوم دے سامنے کوئی اک ثبوت یا دستاویز پیش کرن۔
انہاں آکھیا کہ معدنی وسائل نال مالامال بونیر، سوات، ملاکنڈ، ہزارہ تے کوہاٹ دے ضلعیاں وچ کوئی ایمرجنسی نافذ نہیں کیتی گئی، جس توں ثابت ہوندا اے کہ گورنر راج دا مقصد معدنیات نہیں، بلکہ صرف تے صرف بدامنی دا خاتمہ اے۔
