پنجاب: ایس سال ڈینگی دے مریضاں دی تعداد 270 ہو گئی
وزیرِ صحت ولوں سرویلنس دا جائزہ، ریلوے ورکشاپ توں لاروا ملن اُتے مقدمہ درج کرن دی ہدایت
لاہور (ہیلتھ رپورٹر) پنجاب بھر وچ ایس سال ڈینگی دے تصدیق شدہ مریضاں دی تعداد 270 ہو گئی اے۔ رواں مہینے اکتوبر وچ ہُن تک ڈینگی دے 101 تصدیق شدہ کیس رپورٹ ہوئے نیں، جدوں کہ لاہور سب توں زیادہ متاثرہ شہر اے، جتھے ایس سال 73 کیسز دے نال لاہور پہلے نمبر اُتے اے۔
راولپنڈی 58 کیسز دے نال دوجے نمبر اُتے اے۔ رواں مہینے لاہور وچ 56 تے راولپنڈی وچ ڈینگی دے 25 کیس رپورٹ ہوئے نیں۔
صوبائی وزیر صحت تے آبادی خواجہ عمران نذیر نے ڈینگی سرویلنس ٹیمیں دے نال لاہور دے مختلف مقامات دا اچانک دورہ کیتا۔ اُنہاں نے ریلوے دے گودام تے ورکشاپ وچ چھاپیاں دی قیادت کیتی تے سرویلنس دیاں سرگرمیاں دا جائزہ لیا۔
ریلوے ورکشاپ توں ڈینگی دا لاروا ملن اُتے ناراضی دا اظہار کردیاں اُنہاں متعلقہ افسران دے خلاف مقدمہ درج کراؤن دی ہدایت کر دِتی۔
خواجہ عمران نذیر نے آکھیا کہ ڈینگی دے خلاف کارروائیاں کرنا تہاڈا وی فرض اے۔ جے تاجر یا عام شہری دے خلاف ایف آئی آر درج ہو سکدی اے تاں سرکاری افسر کوئی مقدس گائے نہیں۔ سرویلنس ٹیمیں ہور متحرک ہو کے کم کرن تے شہریاں نوں ڈینگی توں محفوظ رکھن لئی ہاٹ سپاٹس دی مسلسل نگرانی کیتی جاوے۔
