سائبر کرائم دے خلاف وکھ وکھ کارروائیاں، 10 ملزم گرفتار

لاہور (اپنے کامرس رپورٹر توں) نیشنل سائبر کرائم انویسٹی گیشن ایجنسی (این سی سی آئی اے) لاہور زون نے بچیاں دے آن لائن جنسی استحصال سمیت ہور سائبر جرماں وچ ملوث 10 ملزماں نوں گرفتار کر لیا اے۔

این سی سی آئی اے لاہور زون دے ایڈیشنل ڈائریکٹر عاطف امیر نے پریس کانفرنس دوران آکھیا کہ بچیاں دے آن لائن جنسی استحصال تے بلیک میلنگ وچ ملوث اک ملزم نوں گرفتار کیتا گیا اے۔

اُنہاں دَسیا کہ اک ہور کارروائی دوران جعلی کینیڈین شناختی دستاویزات تے پاسپورٹ دیاں تصویراں تیار کرن وچ ملوث قانون دے 3 طالب علماں نوں گرفتار کیتا گیا اے۔

ایل ڈی اے سٹی لاہور وچ پیمنٹ کارڈ فراڈ دے خلاف کارروائی کردیاں 2 ملزماں واجد علی جعفری تے امان علی نوں گرفتار کیتا گیا، جدکہ اک نجی ہاؤسنگ سوسائٹی وچ آن لائن جوئے وچ ملوث 4 ملزماں نوں وی حراست وچ لیا گیا اے۔