سٹیٹ لائف دے کمیشن اُتے کم کرن والے باقاعدہ ملازم نہیں: آئینی عدالت

فیلڈ ورکر ایسوسی ایشن دی رجسٹریشن منسوخی دی درخواست رد کرن دا فیصلہ کالعدم

اسلام آباد (حسیب ریاض ملک) سٹیٹ لائف انشورنس کارپوریشن دے سروس قواعد 1973 دے تحت اوہ فیلڈ ورکرز کارپوریشن دے باقاعدہ ملازماں دی تعریف وچ شامل نہیں، جنہاں دی آمدن حاصل کیتے کاروبار تے وکیاں جان والیاں انشورنس پالیسیاں اُتے ملن والے کمیشن نال جڑی ہووے۔ وفاقی آئینی عدالت نے ایس قانونی نکتے دی بنیاد اُتے فیلڈ ورکرز ایسوسی ایشن دی رجسٹریشن منسوخ کرن دی درخواست رد کرن دا اسلام آباد ہائیکورٹ دا فیصلہ کالعدم قرار دے دتا تے سٹیٹ لائف انشورنس کارپوریشن دی اپیل منظور کر لئی۔

جسٹس علی باقر نجفی ولوں لکھے گئے تفصیلی فیصلے وچ قرار دتا گیا کہ ریکارڈ اُتے موجود سیلز منیجرز، سیلز افسران تے سیلز نمائندیاں دے معاہدیاں دے مطابق، انہاں دی حیثیت کارپوریشن دے باقاعدہ ملازماں توں وکھری اے۔

ایس توں علاوہ وفاقی آئینی عدالت نے قرار دتا کہ مقررہ حد توں ودھ قرار دے کے سرکاری تحویل وچ لئی گئی زمین دا معاملہ حتمی ہون توں بعد دوبارہ نہیں کھولیا جا سکدا۔ تاہم، جے اضافی زمین دا کوئی حصہ غلط طریقے نال سرکاری تحویل وچ لیا گیا ہووے، تاں اوہدی واپسی دے دعوے دا وکھرے طور اُتے جائزہ لیا جا سکدا اے۔

عدالت نے مظہر ریاض دی درخواست رد کردے ہوئے لاہور ہائیکورٹ دا فیصلہ برقرار رکھیا۔ عدالت نے فیصلے وچ آکھیا کہ درخواست گزار دے دادا چودھری افضل نے اپنی زندگی وچ مقررہ حد توں ودھ 544 پی آئی یوز زمین سرکاری تحویل وچ دین دا انتخاب کیتا سی تے ایہ کارروائی مکمل ہو چکی سی۔

ڈپٹی لینڈ کمشنر شیخوپورہ ایہ طے کرن کہ 213 پی آئی یوز زمین اضافی طور اُتے سرکاری تحویل وچ لئی گئی سی۔ جے ایہ ثابت ہو جائے، تاں ایہ زمین اصل مالک دے قانونی وارثاں نوں انہاں دے حصیاں دے مطابق واپس کیتی جاوے۔