اک شخص اُتے 100 توں ودھ مقدمے درج ہو جاندے نیں، ملک وچ تماشا بنیا ہویا اے: سپریم کورٹ
اپنے نظام دا مذاق اسیں آپ بناندے آں، جمشید دستی اُتے انفیکشن پھیلاؤن دا مقدمہ وی درج، کی اوہ بیماریاں پھیلاندے نیں؟ جسٹس ملک شہزاد
الیکشن کمیشن، وفاقی حکومت تے سارے صوبیاں نوں 10 دناں اندر جمشید دستی خلاف درج مقدمیاں دا مکمل ریکارڈ جمع کراؤن دا حکم
اسلام آباد (حسیب ریاض ملک) سپریم کورٹ نے سابق رکن قومی اسمبلی جمشید دستی خلاف مبینہ جعلی ڈگری دے معاملے وچ فوجداری کارروائی نال متعلق کیس دی سماعت دوران الیکشن کمیشن، وفاقی حکومت تے سارے صوبیاں نوں 10 دناں اندر انہاں خلاف درج مقدمیاں دا مکمل ریکارڈ جمع کراؤن دا حکم دے دتا۔ عدالت نے جمشید دستی دی ضمانت وچ 4 نومبر تک توسیع کردیاں معاملہ تین رکنی بینچ نوں بھجوان یا دو رکنی بینچ وچ سنن بارے جائزہ لین دا فیصلہ کیتا۔
جسٹس ملک شہزاد احمد خان دی سربراہی وچ دو رکنی بینچ نے سماعت کیتی۔ پنجاب حکومت دے وکیل نے دَسیا کہ جمشید دستی خلاف صوبے وچ 47 مقدمے درج نیں تے ریکارڈ عدالت وچ جمع کرا دتا گیا اے۔ جمشید دستی دے وکیل دل محمد علیزئی نے مؤقف اختیار کیتا کہ انہاں دے موکل خلاف ایف آئی اے وچ وی خفیہ مقدمے درج نیں۔ جمشید دستی خلاف دو ہزار روپے دا موبائل فون چوری کرن دا مقدمہ وی درج کیتا گیا اے۔
اس اُتے جسٹس عقیل عباسی نے ریمارکس دتے کہ اک شخص خلاف مختلف صوبیاں وچ 100 توں ودھ مقدمے درج ہو جاندے نیں، اتھے تے مَجھ چوری دے وی مقدمے درج ہوندے نیں۔ جمشید دستی اُتے انفیکشن پھیلاؤن دا مقدمہ وی درج اے، کی اوہ بیماریاں پھیلاندے نیں؟ انہاں آکھیا کہ اینے مقدمے درج کر دتے جاندے نیں کہ اک شخص ساری زندگی انہاں نال نبھدا رہے۔ ایس ملک وچ تماشا بنیا ہویا اے، اسیں کدھر جا رہے آں؟ اپنے نظام دا مذاق اسیں آپ بناندے آں۔
جسٹس ملک شہزاد احمد خان نے ریمارکس دتے کہ جمشید دستی رکن پارلیمنٹ رہ چکے نیں تے ساڈے لئی قابلِ احترام نیں۔ جدوں لوک اقتدار وچ ہوندے نیں تاں مخالفین دی گرفتاری اُتے خوش ہوندے نیں، پر اپوزیشن وچ آ کے عدالتاں ول بھجدے نیں۔
جمشید دستی نے عدالت نوں دَسیا کہ اوہ جنوبی پنجاب نال تعلق رکھدے نیں تے انہاں عوام دے حق وچ آواز چکّی، جدکہ انہاں دی جماعت نے وی انہاں نوں شوکاز نوٹس جاری کیتے۔ ایس اُتے جسٹس ملک شہزاد احمد خان نے ریمارکس دتے کہ تہاڈے خلاف مقدمے ویکھ کے وی لگدا اے کہ تسی جہادی او۔
عدالت نے قرار دتا کہ ایس گل دا جائزہ لینا ہووے گا کہ آیا کیس دو رکنی بینچ سن سکدا اے یا ایہہ تین رکنی بینچ نوں بھجیا جاوے۔ عدالت نے ضمانت وچ 4 نومبر تک توسیع کردیاں مزید سماعت ملتوی کر دتی۔
