مریم نواز دا عینک تے ہور جاسوسی آلات اُتے پابندی یقینی بناؤن دا حکم
پنجاب وچ بدمعاشی کلچر برداشت نہیں ہووے گا، معافی نہیں دیواں گے: وزیراعلیٰ پنجاب دا خصوصی اجلاس نال خطاب
دھرنے دوران بہترین ڈیوٹی اُتے آر ایم سی دی تعریف، ڈیوٹی دوران جان گوان والے پولیس افسراں دے وارثاں نوں عمر بھر تنخواہ دین دی ہدایت۔
لاہور (سٹاف رپورٹر، مانیٹرنگ ڈیسک) وزیراعلیٰ پنجاب مریم نواز نے کیمرے والی عینک سمیت ہور جاسوسی آلات اُتے پابندی یقینی بناؤن دا حکم دے دتا۔ اوہناں اپنی صدارت وچ امن و امان بارے ہون والے خصوصی اجلاس دوران پولیس نوں سارے ضلعاں، خاص طور اُتے صوبائی سرحدی علاقیاں توں کਣک دی سمگلنگ روکڻ، رشوت ستانی دے خاتمے دی مہم تے ایس وچ ملوث اہلکاراں خلاف کارروائیاں تیز کرن دیاں ہدایتاں وی جاری کیتیاں۔
خصوصی اجلاس وچ آر پی اوز تے ڈی پی اوز نے ویڈیو لنک راہیں شرکت کیتی تے ڈویژن تے ضلعے دی امن و امان دی صورتحال بارے تفصیلی بریفنگ دتی۔
وزیراعلیٰ مریم نواز شریف نے ٹریفک مینجمنٹ اُتے عدم اعتماد دا اظہار کیتا تے تیز رفتاری خلاف یقینی کارروائی دی ہدایت دتی۔ پولیس نوں صوبے بھر وچ ناجائز اسلحہ رکھن والیاں خلاف پیشگی کارروائی، اسلحہ برآمد کرن تے گشت یقینی بناؤن دا حکم دتا۔ وزیراعلیٰ نے سارے آر پی اوز نوں ہر قسم دے جرائم بارے ہفتہ وار اجلاس کرن دی ہدایت وی دتی۔
مریم نواز نے لاہور وچ ڈولفن فورس نوں گشت لئی موٹرسائیکلاں تے ہور سہولتاں فراہم کرن دا حکم دتا۔ اوہناں مجوزہ دھرنے دوران بہترین ڈیوٹی اُتے آر ایم سی دی تعریف کیتی تے ڈیوٹی دوران جان گوان والے پولیس اہلکاراں نوں خراجِ عقیدت پیش کردیاں جاں بحق پولیس افسراں دے خاندانواں نوں عمر بھر تنخواہ تے مالی پیکیج دین دی ہدایت دتی۔
اجلاس دوران وزیراعلیٰ مریم نواز شریف نے راولپنڈی ڈویژن وچ امن و امان دی صورتحال اُتے تشویش دا اظہار کیتا تے ملتان دے واقعے سمیت ہر سنگین جرم بارے تفصیلی بریفنگ لئی۔
آئی جی پنجاب نے صوبے بھر وچ امن و امان دی مجموعی صورتحال بارے تفصیلی بریفنگ دتی تے دسیا کہ پنجاب وچ جرائم دی مجموعی شرح وچ کمی دا رجحان جاری اے۔
بریفنگ مطابق لاہور وچ جرائم دی مجموعی شرح وچ 41 فیصد کمی آئی۔ ڈیرہ غازی خان ریجن وچ مجموعی جرائم 16 فیصد، کوٹ ادو وچ 27 فیصد، راجن پور وچ 7 فیصد، لیہ وچ 25 فیصد، ڈیرہ غازی خان وچ 9 فیصد تے مظفرگڑھ وچ 25 فیصد کمی ریکارڈ کیتی گئی۔
بہاولپور ریجن وچ جرائم دی شرح مجموعی طور اُتے 52 فیصد، شیخوپورہ ریجن وچ 32 فیصد، ملتان ریجن وچ 47 فیصد تے راولپنڈی ریجن وچ 36 فیصد کمی آئی۔
بریفنگ وچ دسیا گیا کہ ساہیوال ریجن وچ جرائم 42 فیصد، گوجرانوالہ ریجن وچ 67 فیصد تے گجرات ریجن وچ 58 فیصد گھٹے۔
وزیراعلیٰ مریم نواز نے آکھیا کہ پنجاب وچ بدمعاشی کلچر برداشت نہیں ہووے گا تے کوئی معافی نہیں دتی جائے گی۔ منشیات دے خاتمے لئی بھرپور کارروائی یقینی بنائی جائے۔ جرائم دے ہاٹ سپاٹ دی نشاندہی کرن تے جرائم پیشہ نیٹ ورک توڑن لئی مؤثر اقدامات کیتے جان۔
اوہناں مزید آکھیا کہ صوبے بھر وچ ہر پاسے پولیس گشت نظر آنا چاہیدا اے، تاں جو جرائم پیشہ افراد وچ قانون دا خوف پیدا ہووے۔ ہجوم نال نمٹن لئی مخصوص آر ایم سی پولیس فورس دی صلاحیت ودھاؤن دا عمل مستقل جاری رکھیا جائے۔
