اسرائیل وچ چوناں، نیتن یاہو دے خلاف اپوزیشن جماعتاں نوں معمولی برتری، سیاسی ڈیڈلاک پیدا ہون دا امکان: ایگزٹ پولز

اسرائیل دیاں چوناں: اپوزیشن اتحاد نوں 52 توں 53، نیتن یاہو دے اتحاد نوں 50 نشستاں ملن دا امکان، عرب جماعتاں نوں 120 رکنی پارلیمان وچ 17 یا 18 نشستاں ملن دیاں امیداں: ابتدائی ایگزٹ پولز

نیتن یاہو دا عرب جماعتاں اُتے ووٹ چوری تے دھاندلی دا الزام، وزیراعظم انتخابی نتیجیاں نوں چیلنج کرن لئی بہانے لبھ رہے نیں: اپوزیشن، ریکارڈ ووٹنگ، اپوزیشن دا جشن قبل از وقت اے: وزیر خارجہ

مقبوضہ بیت المقدس (اے ایف پی) — اسرائیل وچ منگل نوں ہون والیاں عام چوناں دے ابتدائی نتیجیاں مطابق اپوزیشن جماعتاں نوں وزیراعظم نیتن یاہو دے اتحاد اُتے معمولی برتری حاصل ہوئی اے۔ ایہہ چوناں 7 اکتوبر 2023 دے حملیاں دے صدمے توں بعد ملک وچ پہلی واری ہوئیاں نیں، جِنہاں وچ ووٹراں دی شرکت پچھلی کئی دہائیاں دے مقابلے وچ ریکارڈ سطح اُتے رہی۔

اسرائیل دے سب توں لمبے عرصے تک وزیراعظم رہن والے نیتن یاہو، جنہاں تقریباً دو دہائیاں ملک دی قیادت کیتی اے، نے انتخابی مہم دوران حماس توں لے کے ایران تک اپنے دشمنآں دے خلاف کارروائیاں دا وعدہ کیتا سی۔ اوہناں انتخابی دن اسرائیلی عرب ووٹراں دی ودھدی ہوئی طاقت بارے خدشے وی ظاہر کیتے۔

اسرائیلی ٹیلی وژن نیٹ ورکس اُتے نشر ہون والے ابتدائی ایگزٹ پولز مطابق، سابق فوجی سربراہ تے مرکز دائیں بازو دے رہنما گادی آئزنکوٹ دی قیادت وچ قائم اتحاد نوں نیتن یاہو دے اتحاد اُتے معمولی برتری حاصل سی۔ نیتن یاہو دے اتحاد وچ انتہا پسند دائیں بازو دیاں جماعتاں وی شامل نیں۔

ابتدائی ایگزٹ پولز مطابق اسرائیلی عرب جماعتاں نے نمایاں کامیابی حاصل کیتی اے، جس دے نتیجے وچ اگلی پارلیمان اندر اوہناں نوں فیصلہ کن کردار ملن دا امکان اے۔

کسی وی اک جماعت نوں واضح اکثریت نہ ملن دی صورت وچ اسرائیلی سیاست داناں نوں حکومت بناؤن لئی مختلف جماعتاں نوں نال ملاؤن واسطے کئی ہفتیاں تک اہم تے پیچیدہ مذاکرات کرنے پے سکدے نیں۔

اسرائیل دے تین وڈے ٹیلی وژن چینلز، 11، 12 تے 13، دے انتخابی اندازیاں مطابق اپوزیشن اتحاد نوں 52 توں 53 نشستاں ملن دا امکان اے، جدکہ نیتن یاہو دے اتحاد نوں تقریباً 50 نشستاں مل سکدیاں نیں۔ تاہم، نیتن یاہو دی جماعت لیکوڈ پارلیمان دی سب توں وڈی اکیلی جماعت بن کے اُبھر سکدی اے، جس نوں 24 یا 25 نشستاں ملن دا امکان ظاہر کیتا گیا اے۔

ابتدائی ایگزٹ پولز وچ عرب اکثریتی جماعتاں دی نمایاں کامیابی ظاہر ہوئی اے، جدکہ اوہناں دے حامیواں نے وڈی تعداد وچ ووٹ پائے۔

اسرائیل دے وڈے ٹیلی وژن چینلز دے ایگزٹ پولز مطابق عرب جماعتاں دے دو انتخابی اتحاداں نوں 120 رکنی پارلیمان وچ مجموعی طور اُتے 17 یا 18 نشستاں ملن دا امکان اے۔ ایہہ تعداد 2022 دیاں پچھلیاں چوناں وچ حاصل کیتیاں 10 نشستاں دے مقابلے وچ نمایاں اضافہ اے۔

ودھ توں ودھ ووٹ حاصل کرن دی کوشش وچ نیتن یاہو نے الزام لایا کہ اسرائیلی عرب ووٹر انتخابات نوں چوری کرن دی کوشش کر رہے نیں۔

اوہناں دی جماعت لیکوڈ نے انتخابی حکام کولوں رات 10 وجے توں بعد وی پولنگ جاری رکھن دی درخواست کیتی، پر ایہہ درخواست رد کر دتی گئی۔

نیتن یاہو دیاں انہاں کوششاں اُتے اپوزیشن نے الزام لایا کہ اوہ انتخابی نتیجیاں نوں چیلنج کرن لئی بہانے لبھ رہے نیں۔

لیکوڈ دے مضبوط انتخابی حلقیاں وچ ووٹراں دی شرکت ودھاؤن دی کوشش کردیاں نیتن یاہو نے اپنے حامیواں نوں خطاب کردیاں آکھیا، ’’اسیں ایہہ لڑائی ایتھے کھبے بازو تے انہاں عرب جماعتاں دے ہتھاں وچ نہیں چھڈ سکدے، جیہڑیاں یہودی ریاست دا خاتمہ چاہندیاں نیں۔‘‘ ایس موقعے اُتے اوہناں دے چہرے تے لہجے توں تناؤ صاف ظاہر ہوندا سی۔

نیتن یاہو نے دائیں بازو دے ووٹراں نوں اپیل کیتی کہ اوہ گھرآں توں باہر نکلن تے ووٹ پاؤن لئی پولنگ سٹیشناں اُتے پہنچن۔ سوشل میڈیا پلیٹ فارم ایکس اُتے نیتن یاہو نے لکھیا کہ جے تُسی ووٹ پاؤن لئی باہر نہ آئے تاں عرب جماعتاں دی حکومت قائم ہو جاوے گی۔

ملک بھر وچ رات 8 وجے تک ووٹراں دی شرکت تقریباً 75 فیصد تک پہنچ گئی سی، جیہڑی کئی دہائیاں دوران بلند ترین شرحاں وچوں اک اے۔

تجزیہ کاراں مطابق، دوناں رہنمآں دے سیاسی اتحاد پارلیمان وچ حکومت بناؤن لئی ضروری 61 نشستاں حاصل کرن وچ ناکام رہ سکدے نیں۔ ایس نتیجے وچ حکومت دی تشکیل لئی کئی ہفتیاں، بلکہ کئی مہینیاں تک سیاسی جوڑ توڑ تے مذاکرات جاری رہن دا امکان اے، جس نال حکومت سازی وچ ڈیڈلاک پیدا ہو سکدا اے۔

مرکزی الیکشن کمیٹی مطابق، کجھ مشتبہ افراد نوں ووٹراں نوں رشوت دین دی کوشش اُتے گرفتار کیتا گیا۔ اسرائیل وچ انتخابی مہم دوران پولیس نے کھبے بازو دی اک اہم جماعت دے رہنما یائیر گولان ول دھمکی آمیز انداز وچ ودھن والے چاقو بردار شخص نوں گرفتار کر لیا۔

اسرائیلی وزیراعظم نیتن یاہو دے مرکزی انتخابی حریف گادی آئزنکوٹ نے منگل دے روز آکھیا کہ ملک دیاں اہم عام چوناں دے ابتدائی ایگزٹ پولز وزیراعظم اُتے عوام دے ’’مکمل عدم اعتماد‘‘ دی عکاسی کردے نیں۔

آئزنکوٹ نے آکھیا، ’’ابتدائی ایگزٹ پولز دے نتیجے نیتن یاہو تے 7 اکتوبر والی حکومت اُتے مکمل عدم اعتماد ظاہر کردے نیں۔‘‘

اسرائیلی اپوزیشن دے موجودہ سربراہ یائیر لاپڈ نے وی آکھیا کہ نیتن یاہو دے اتحاد نوں ’’شرمناک شکست‘‘ دا سامنا کرنا پیا اے، جدکہ کھبے بازو دے رہنما یائیر گولان نے دعویٰ کیتا کہ عوام نے ’’نیتن یاہو دی حکومت نوں برطرف کر دتا اے۔‘‘

اسرائیلی وزیر خارجہ گیڈون ساعر نے آکھیا کہ اپوزیشن جماعتاں ولوں جشن مناؤن دا عمل قبل از وقت اے۔