افغانستان ولوں بلااشتعال فائرنگ دا منہ توڑ جواب، پوسٹاں تباہ
طالبان رجیم دا شہری آبادی اُتے حملہ، گھر اُتے گولہ ڈِگن نال اک شہید، 5 زخمی، بنوں دھماکے وچ امن کمیٹی دا رکن زخمی، پُتر جاں بحق، جنوبی وزیرستان وچ ڈرون حملہ
ڈیرہ اسماعیل خان، جنوبی وزیرستان — پاک افغان سرحد اُتے افغان طالبان رجیم دی اشتعال انگیزی دے جواب وچ پاک فوج نے بھرپور کارروائی کردیاں کئی افغان پوسٹاں تباہ کر دتیاں۔
ذرائع مطابق جنوبی وزیرستان دے علاقے انگور اڈے وچ افغان طالبان رجیم نے شہری آبادی نوں نشانہ بنایا۔ اک گولہ رہائشی مکان اُتے ڈِگیا، جس نال اک ہی خاندان دے 5 افراد زخمی ہو گئے، جدکہ حملے وچ اک شہری نے جامِ شہادت نوش کیتا۔
پاک فوج نے افغان جارحیت دا فوری تے بھرپور جواب دتا تے افغان فورسز دیاں کئی چیک پوسٹاں تباہ کر دتیاں۔
دوجے پاسے بنوں وچ قبائلی مشر تے امن کمیٹی دے رکن ملک سبیل خان دی گاڑی اُتے آئی ای ڈی دھماکا ہویا، جس نال اوہناں دا پُتر جاں بحق ہو گیا، جدکہ ملک سبیل خان سمیت 3 افراد زخمی ہو گئے۔
ملک سبیل خان دی گاڑی نوں بنوں ٹاؤن شپ دے علاقے دبک سید خیل وچ سڑک کنارے نصب آئی ای ڈی نال نشانہ بنایا گیا۔ دھماکے دے نتیجے وچ اوہناں دا پُتر ملک اینار جاں بحق ہو گیا، جدکہ ملک سبیل خان سمیت 3 افراد زخمی ہو گئے۔ زخمیوں نوں طبی امداد لئی ہسپتال منتقل کر دتا گیا۔
ایس توں علاوہ جنوبی وزیرستان دی کراچ خیل مسجد وچ نماز دوران مبینہ ڈرون یا کواڈ کاپٹر حملے دے نتیجے وچ 4 افراد زخمی ہو گئے، جدکہ علاقے وچ مارٹر گولے ڈِگن تے فائرنگ دیاں وی اطلاعات سامنے آئیاں۔
واقعہ نماز دوران پیش آیا۔ زخمی ہون والے افراد وچ ولی مت خان ولد مشال خان، صدام حسین ولد لعل گل، سعید ولد میر عباس تے قاری حسین ولد میر عباس شامل نیں۔
اطلاعات مطابق مسلسل فائرنگ تے گولہ باری دے باعث زخمیوں نوں محفوظ مقام اُتے منتقل کرن وچ شدید مشکلات دا سامنا کرنا پیا۔ مسلسل ڈرون یا کواڈ کاپٹر حملیاں، مارٹر گولے ڈِگن تے فائرنگ دیاں آوازاں دے باعث لوک گھراں وچ محصور ہو کے رہ گئے۔
