اوکھے حالات وچ وی انصاف دی فراہمی عدالتی اداریاں دی مضبوطی دا ثبوت اے: چیف جسٹس یحییٰ آفریدی

عدالتی ڈھانچے دی بہتری دے منصوبے وڈی حد تک مکمل، صرف 6 عدالتی کمپلیکسز وچ تکنیکی مسئلیاں کارن کم باقی

وکیلّاں دی پیشہ ورانہ صلاحیت ودھاؤن لئی لگاتار قانونی تعلیم بنیادی اہمیت رکھدی اے: بلوچستان دے وکیلّاں دے وفد نال گل بات

اسلام آباد چیف جسٹس پاکستان یحییٰ آفریدی نے آکھیا اے کہ اوکھے حالات وچ وی عدالتاں دا فعال رہنا تے انصاف دی فراہمی جاری رکھنا عدالتی اداریاں دی مضبوطی دا ثبوت اے۔

بلوچستان نال تعلق رکھن والے 51 وکیلّاں دے وفد نے چیف جسٹس یحییٰ آفریدی نال سپریم کورٹ وچ ملاقات کیتی۔ وفد فیڈرل جوڈیشل اکیڈمی دے مسلسل قانونی تعلیم دے تربیتی پروگرام وچ شریک ہویا۔

بلوچستان بار کونسل ولوں صوبے دے مختلف ضلعیاں دیاں بار ایسوسی ایشنز توں 51 وکیلّاں نوں تربیتی پروگرام لئی نامزد کیتا گیا اے۔ چیف جسٹس نے وکیلّاں دا خیرمقدم کیتا تے پیشہ ورانہ تربیت لئی فیڈرل جوڈیشل اکیڈمی دیاں کوششاں دی تعریف کیتی۔

اُنہاں آکھیا کہ وکیلّاں دی پیشہ ورانہ صلاحیت ودھاؤن لئی مسلسل قانونی تعلیم بنیادی اہمیت رکھدی اے۔ وکیل اپنی پیشہ ورانہ مہارت وچ اضافہ کرن لئی لگاتار علم حاصل کرن تے اعلیٰ اخلاقی معیاراں دی پابندی کرن۔

تربیت دوران حاصل کیتے گئے علم نوں مؤثر قانونی پریکٹس وچ ورتیا جائے۔ وکیل اپنا علم تے تجربہ ہور وکیلّاں تک وی پہنچاؤن تے نظامِ انصاف اُتے عوام دا اعتماد مضبوط کرن وچ اپنا مؤثر کردار ادا کرن۔

چیف جسٹس نے دسیا کہ انصاف تک رسائی دے ترقیاتی فنڈ تحت ملک بھر دے عدالتی کمپلیکسز تے بار رومز وچ بنیادی سہولتاں فراہم کیتیاں گئیاں نیں۔

اِنہاں سہولتاں وچ سولر سسٹم، انٹرنیٹ نال جڑیاں ای لائبریریاں تے پین لئی صاف پانی دی فراہمی شامل اے۔ خواتین لئی مخصوص سہولتاں مہیا کرنا وی اصلاحاتی اقدامات دا حصہ اے۔

اُنہاں آکھیا کہ عدالتی ڈھانچے دی بہتری دے منصوبے وڈی حد تک مکمل ہو چکے نیں، صرف 6 عدالتی کمپلیکسز وچ تکنیکی مسئلیاں دی وجہ توں کم باقی اے۔ وکیل اپنی پیشہ ورانہ مہارت نوں بہتر بنانے لئی جدید ٹیکنالوجی توں فائدہ چکن۔