سندھ تے گلگت بلتستان وچ ادارہ جاتی تعاون مضبوط بناؤن اُتے اتفاق
جی بی وچ صحت، محصولات تے سیلاب متاثرہ خاندانواں دے گھراں دی دوبارہ تعمیر دے شعبیاں وچ مکمل تعاون کراں گے: مراد علی شاہ
وزیراعلیٰ امجد حسین آزاد نوں ملاقات دوران یقین دہانی، گلگت بلتستان تے این آئی سی وی ڈی وچ مفاہمتی یادداشت اُتے دستخط دی تجویز
کراچی (سٹاف رپورٹر) وزیراعلیٰ سندھ مراد علی شاہ نے گلگت بلتستان دے وزیراعلیٰ امجد حسین آزاد نوں یقین دہانی کرائی کہ سندھ حکومت گلگت بلتستان وچ صحت دیاں سہولتاں بہتر بناؤن، محصولات دے نظام نوں مضبوط کرن تے سیلاب توں متاثرہ خاندانواں دے گھراں دی دوبارہ تعمیر لئی مکمل تعاون کرے گی۔
ایہ اتفاقِ رائے دوناں وزرائے اعلیٰ دے درمیان وزیراعلیٰ ہاؤس وچ ہون والی ملاقات دوران ہویا، جس وچ باہمی دلچسپی دے مختلف معاملے اُتے تبادلۂ خیال کیتا گیا تے سندھ تے گلگت بلتستان دے درمیان ادارہ جاتی تعاون مضبوط بناؤن اُتے اتفاق کیتا گیا۔
گلگت بلتستان دے وزیراعلیٰ نے اپنے صوبے وچ امراضِ قلب دے ہسپتال دیاں سہولتاں بہتر بناؤن لئی سندھ حکومت توں مدد منگی۔ مراد علی شاہ نے قومی ادارہ برائے امراضِ قلب (این آئی سی وی ڈی) نوں ہدایت کیتی کہ گلگت بلتستان وچ ہسپتال دی بہتری تے امراضِ قلب دے علاج دیاں سہولتاں نوں بہتر بناؤن لئی تکنیکی تے ادارہ جاتی معاونت فراہم کیتی جاوے۔
اُنہاں تجویز دتی کہ حکومتِ گلگت بلتستان قومی ادارہ برائے امراضِ قلب دے نال مفاہمتی یادداشت اُتے دستخط کرے۔
دونوں وزرائے اعلیٰ نے گلگت بلتستان وچ بورڈ آف ریونیو دے قیام تے علاقے وچ محصولات دے مؤثر انتظامی نظام دی تشکیل بارے وی تفصیلی گل بات کیتی۔ مراد علی شاہ نے چیئرمین سندھ ریونیو بورڈ نوں ہدایت کیتی کہ ایس سلسلے وچ حکومتِ گلگت بلتستان نوں مکمل معاونت فراہم کیتی جاوے۔
دونوں دھراں نے طرزِ حکمرانی تے عوامی خدمات دی فراہمی بہتر بناؤن لئی ادارہ جاتی تعاون نوں فروغ دین تے مہارتاں دا تبادلہ کرن اُتے اتفاق کیتا۔
اجلاس دوران گلگت بلتستان وچ سیلاب توں متاثرہ خاندانواں دے گھراں دی دوبارہ تعمیر بارے ہون والی پیش رفت دا وی جائزہ لیا گیا۔ وزیراعلیٰ سندھ نے دسیا کہ سندھ پیپلز ہاؤسنگ فار فلڈ افیکٹیز دی اک ٹیم نے متاثرہ خاندانواں دیاں رہائشی ضروریات دا جائزہ لین لئی گلگت بلتستان دی انتظامیہ دے تعاون نال سروے دا کم شروع کر دتا اے۔
اُنہاں سندھ پیپلز ہاؤسنگ فار فلڈ افیکٹیز دے سربراہ خالد شیخ نوں ہدایت کیتی کہ گلگت بلتستان وچ گھراں دی تعمیر دا کم جنوری یا فروری وچ شروع کرن نوں یقینی بنایا جاوے۔
اجلاس وچ اتفاق ہویا کہ دونے حکومتاں صحت، محصولات دے انتظام تے گھراں دی دوبارہ تعمیر دے شعبیاں وچ تعاون مضبوط بناؤن گیاں، جدکہ سندھ حکومت گلگت بلتستان وچ عوامی خدمات نال متعلق اہم چیلنجز نال نمٹن لئی ادارہ جاتی مدد تے تکنیکی مہارت فراہم کرے گی۔
