بیرونِ ملک تعلیم دے ناں اُتے طلبہ نال لوٹ مار، سینیٹ کمیٹی برہم
لائبہ دے معاملے اُتے ایچ ای سی تے وزارتِ خارجہ دے نمائندیاں نوں ریکارڈ سمیت پیش ہون دی ہدایت
اسلام آباد (خصوصی رپورٹر) سینیٹ دی قائمہ کمیٹی برائے انسانی حقوق نے سائبر کرائم، آن لائن مالی فراڈ تے بیرونِ ملک تعلیم دے ناں اُتے طلبہ نوں لُٹن دے واقعات اُتے تشویش تے سخت برہمی دا اظہار کیتا۔ کمیٹی نے متعلقہ اداریاں نوں تحقیقات تیز کرن تے متاثرین نوں انصاف فراہم کرن دی ہدایت کر دتی۔
سینیٹر ثمینہ ممتاز زہری دی صدارت وچ ہون والے اجلاس دوران صومالیہ دے ساحل دے نیڑے یرغمال بنائے گئے پاکستانی ملاحاں دے معاملے اُتے بریفنگ دتی گئی۔
کمیٹی نے پاکستانی ملاحاں دے اغوا تے متاثرہ خاندانوں نوں معاوضے دی ادائیگی نہ ہون اُتے تشویش دا اظہار کیتا۔ جاں بحق افراد دیاں میتاں وطن واپس لیاؤن، زخمی ملاحاں دے علاج تے متاثرہ خاندانوں نوں مالی امداد دی فراہمی وچ تاخیر اُتے وضاحت منگی گئی، جدکہ معاوضیاں دی ادائیگی دا مکمل ریکارڈ پیش کرن دی ہدایت وی دتی گئی۔
کمیٹی نوں گولڈ میڈلسٹ طالبہ لائبہ اعجاز دی موت، مبینہ جعلی امریکی تعلیمی دستاویزات تے مالی فراڈ دیاں تحقیقات بارے وی بریفنگ دتی گئی۔
چیئرپرسن نے شفاف تحقیقات یقینی بناؤن لئی متعلقہ اداریاں تے وزارتاں دے درمیان رابطہ بہتر بناؤن دی ہدایت کیتی۔
اجلاس دوران ہائر ایجوکیشن کمیشن (ایچ ای سی) تے وزارتِ خارجہ دے نمائندیاں دی غیر حاضری اُتے وی برہمی دا اظہار کیتا گیا۔ کمیٹی نے دوناں اداریاں دے نمائندیاں نوں اگلے اجلاس وچ متعلقہ ریکارڈ سمیت پیش ہون دی ہدایت کر دتی۔
