دوجے بینچاں دیاں درخواستاں پرنسپل سیٹ اُتے دائر کرن بارے اعتراضات برقرار

کیس مخصوص بینچ وچ لگاؤن دی سفارش اُتے چیف جسٹس دا وکیل اُتے اظہارِ برہمی، درخواست گزاراں نوں راولپنڈی بینچ نال رجوع کرن دی ہدایت

لاہور (کورٹ رپورٹر) لاہور ہائیکورٹ نے دوجے بینچاں دیاں درخواستاں پرنسپل بینچ وچ دائر کرن دے حوالے نال درخواستاں اُتے دفتری اعتراضات برقرار رکھدیاں درخواست گزاراں نوں متعلقہ بینچاں نال رجوع کرن دی ہدایت کر دتی۔

لاہور ہائیکورٹ دی چیف جسٹس عالیہ نیلم نے اکّو جیہی نوعیت دیاں متعدد اعتراضی درخواستاں دی سماعت کیتی۔

چیف جسٹس عالیہ نیلم نے وکیل ولوں کیس نوں مخصوص بینچ دے روبرو لگاؤن دی سفارش کرن اُتے اظہارِ برہمی کردیاں ریمارکس دتے کہ ہائیکورٹ دے قواعد دے مطابق تہاڈی درخواست دوجے بینچ وچ دائر ہونی چاہیدی سی۔ وکیل صاحب، تسی ایہہ عدالت دی توہین کر رہے او۔

چیف جسٹس نے آکھیا کہ راولپنڈی بینچ وچ 20 ہزار کیس زیرِ التوا سن، جیہڑے ہُن گھٹ کے 12 ہزار رہ گئے نیں۔ ہائیکورٹ دی پرنسپل سیٹ اُتے 60 ہزار 173 درخواستاں دے فیصلے کیتے گئے نیں۔

انہاں وکیل نوں مخاطب کردیاں آکھیا کہ تسی اعتراضات دی گل کردے او، ایہہ وی دسو کہ تسی درخواستاں کِویں دائر کردے او۔

عدالت نے دفتری اعتراضات برقرار رکھدیاں درخواست گزاراں نوں راولپنڈی بینچ جا کے رجوع کرن دی ہدایت کیتی تے درخواستاں نمٹا دتیاں۔