بنوں وچ دھماکہ، امن کمیٹی دے رکن سمیت 3 زخمی، پُتر جاں بحق، جنوبی وزیرستان وچ ڈرون حملے، 4 زخمی
ملک سبیل دی گاڑی نوں ٹاؤن شپ دبک سید خیل وچ سڑک دے کنارے نصب آئی ای ڈی نال نشانہ بنایا گیا۔ کراچ خیل مسجد وچ نماز دوران حملے، لگاتار فائرنگ تے گولہ باری دی وجہ توں زخمیآں نوں منتقل کرن وچ مشکلات دا سامنا کرنا پیا۔
ڈیرہ اسماعیل خان (مانیٹرنگ ڈیسک) بنوں وچ قبائلی مشر تے امن کمیٹی دے رکن ملک سبیل خان دی گاڑی اُتے آئی ای ڈی دھماکہ ہویا، جس دے نتیجے وچ اُنہاں دا پُتر جاں بحق، جدکہ ملک سبیل خان سمیت 3 افراد زخمی ہو گئے۔
ملک سبیل خان دی گاڑی نوں بنوں ٹاؤن شپ دے علاقے دبک سید خیل وچ سڑک دے کنارے نصب آئی ای ڈی نال نشانہ بنایا گیا۔ دھماکے دے نتیجے وچ اُنہاں دا پُتر ملک اینار جاں بحق ہو گیا، جدکہ ملک سبیل خان سمیت 3 افراد زخمی ہو گئے۔ زخمیآں نوں طبی امداد لئی ہسپتال منتقل کر دِتا گیا۔
دریں اثنا، جنوبی وزیرستان دے علاقے کراچ خیل دی مسجد وچ نماز دوران مبینہ ڈرون یا کواڈ کاپٹر حملیاں دے نتیجے وچ 4 افراد زخمی ہو گئے، جدکہ علاقے وچ مارٹر گولے ڈِگن تے فائرنگ دیاں اطلاعات وی سامنے آئیاں۔
ایہ واقعہ نماز دوران پیش آیا۔ زخمیآں وچ ولی مت خان ولد مشال خان، صدام حسین ولد لعل گل، سعید ولد میر عباس تے قاری حسین ولد میر عباس شامل نیں۔
اطلاعات دے مطابق، مسلسل فائرنگ تے گولہ باری دی وجہ توں زخمیآں نوں محفوظ مقام اُتے منتقل کرن وچ شدید مشکلات دا سامنا کرنا پیا۔ لگاتار ڈرون یا کواڈ کاپٹر حملیاں، مارٹر گولے ڈِگن تے فائرنگ دیاں آوازاں دے باعث لوک گھراں وچ محصور ہو کے رہ گئے۔
