سپین وچ تیز رفتار ریل گاڈیاں دی ٹکر، 68 افراد ہلاک، 100 توں ودھ زخمی
حادثہ میڈرڈ دے جنوب وچ پیش آیا، 15 زخمیآں دی حالت تشویشناک، ہلاکتاں ودھن دا خدشہ، تین روزہ سوگ دا اعلان۔ صدر آصف علی زرداری، وزیراعظم شہباز شریف تے سینیٹر اسحاق ڈار دا ٹرین دے المناک حادثے اُتے افسوس دا اظہار۔
میڈرڈ، اسلام آباد (اے ایف پی، اے پی پی)
سپین دے دارالحکومت میڈرڈ دے جنوب وچ دو تیز رفتار ٹریناں دی ٹکر دے نتیجے وچ 68 افراد ہلاک تے 100 توں ودھ زخمی ہو گئے۔ حکام دے مطابق ہلاکتاں دی تعداد وچ ہور اضافے دا خدشہ اے۔
وزیراعظم پیڈرو سانچیز نے حادثے توں بعد ملک بھر وچ تین روزہ سوگ دا اعلان کیتا اے۔ جائے حادثہ اُتے گل بات کردیاں انہاں آکھیا کہ پورا سپین سوگوار اے۔ وزیراعظم دا کہنا سی کہ سپین ورگے ملک وچ اک ہی سال دوران ایسے دو وڈے حادثیاں دا پیش آنا ناقابلِ قبول اے۔
علاقائی حکومت دی ترجمان نے دَسیا کہ 100 توں ودھ افراد زخمی ہوئے نیں، جنہاں وچوں 58 نوں ہسپتال منتقل کیتا گیا اے، جدکہ 15 زخمیآں دی حالت تشویشناک اے۔
سپین دی سرکاری ریلوے کمپنی رینفے نے اک بیان وچ تصدیق کیتی اے کہ میڈرڈ توں جنوبی سپین جان والی مرکزی تیز رفتار ریلوے لائن اُتے ٹریفک معطل کر دتی گئی اے۔ حادثہ رینفے دی اک ٹرین تے سپین دی نجی کمپنی ایریو دی اک ٹرین وچ پیش آیا۔
ایریو نے اپنے بیان وچ آکھیا کہ اوہدی ٹرین وچ 147 مسافر تے ڈرائیور سمیت عملے دے پنج افراد سوار سن۔
کمپنی دے مطابق رینفے دی ٹرین نے اوہدی ٹرین نوں پچھوں ٹکر ماری۔ خبر رساں ادارے اے ایف پی دے مطابق وسطی علاقے کاسٹیلا لا مانچا وچ جائے حادثہ اُتے اک ٹرین دوجی ٹرین وچ دھنس گئی۔ ٹرین دیاں کئی بوگیاں پٹڑی توں اتر کے پشتے تھلے جا ڈگیاں تے ملبے دا ڈھیر بن گئیاں۔
صدر آصف علی زرداری، وزیراعظم شہباز شریف تے نائب وزیراعظم سینیٹر اسحاق ڈار نے سپین وچ ٹریناں دے المناک حادثے اُتے افسوس دا اظہار کیتا اے۔
صدر مملکت نے ایکس اُتے اپنی پوسٹ وچ حادثے وچ ہلاک ہون والے افراد دے خاندانواں نال دلی تعزیت تے زخمیآں نال ہمدردی دا اظہار کیتا۔ انہاں نے ایس مشکل گھڑی وچ سپین دی قیادت تے عوام نال یکجہتی ظاہر کیتی تے زخمیآں دی جلد تے مکمل صحت یابی لئی نیک تمناؤں دا اظہار کیتا۔
وزیراعظم شہباز شریف نے ہسپانوی وزیراعظم پیڈرو سانچیز، سپین دے عوام تے اپنے پیاریاں نوں گوا بیٹھن والے خاندانواں نال دلی تعزیت کیتی اے۔ ایکس اُتے اپنے پیغام وچ وزیراعظم نے زخمیآں دی جلد صحت یابی لئی دعا کیتی تے آکھیا کہ پاکستان دکھ دی ایس گھڑی وچ سپین دے نال کھڑا اے۔
نائب وزیراعظم تے وزیر خارجہ سینیٹر محمد اسحاق ڈار نے آکھیا کہ ٹریناں دے المناک تصادم وچ ہلاکتاں اُتے دلی دکھ تے افسوس اے۔ انہاں زخمیآں دی جلد صحت یابی لئی دعا کیتی تے آکھیا کہ پاکستان ایس مشکل وقت وچ سپین دی حکومت تے عوام نال مکمل یکجہتی دا اظہار کردا اے۔
