اسحاق ڈار نال مکہ دفاعی اتحاد دے سیکرٹری جنرل دی ملاقات
اسحاق ڈار نال مکہ دفاعی اتحاد دے پہلے سیکرٹری جنرل دی ملاقات
لیفٹیننٹ جنرل (ر) نعمان محمود نوں تقرری اُتے مبارکباد، نیک خواہشات دا اظہار، نائب وزیراعظم دا تاجکستان تے عمان دے وزرائے خارجہ نال ٹیلی فونک رابطہ
اسلام آباد (وقائع نگار): نائب وزیراعظم اسحاق ڈار نال مکہ دفاعی اتحاد دے پہلے سیکرٹری جنرل لیفٹیننٹ جنرل (ر) نعمان محمود نے وزارتِ خارجہ وچ ملاقات کیتی۔
اسحاق ڈار نے لیفٹیننٹ جنرل (ر) نعمان محمود نوں انہاں دی تقرری اُتے مبارکباد دِتی تے اہم ذمہ واریاں دی ادائیگی وچ کامیابی لئی نیک خواہشات دا اظہار کیتا۔
اسحاق ڈار نے علاقائی تے عالمی امن تے استحکام لئی پاکستان دیاں جاری سفارتی کوششاں اُتے روشنی پاندیاں خطے وچ پائیدار امن نوں فروغ دین لئی مکہ دفاعی اتحاد دے اہم کردار اُتے زور دِتا۔
دریں اثنا، اسحاق ڈار نے تاجکستان دے وزیر خارجہ سراج الدین مہرالدین نال ٹیلی فون اُتے گل بات کیتی۔ ایس دوران دوناں پاسیاں نے پاکستان تے تاجکستان دے دیرینہ دوستانہ تعلقات نوں ہور مضبوط بناؤن تے باہمی مفاد اُتے مبنی تعاون نوں وسعت دین لئی مل کے کم کرن دے عزم دا اعادہ کیتا۔
اسحاق ڈار نے سلطنتِ عمان دے وزیر خارجہ سید بدر بن حمد بن حمود البوسعیدی نال وی ٹیلی فون اُتے گل بات کیتی۔ دوناں رہنماواں نے دوطرفہ تعلقات دے فروغ تے علاقائی صورتِ حال اُتے تبادلہ خیال کردیاں خطے وچ امن تے استحکام لئی اپنے مشترکہ عزم دا اعادہ کیتا۔
نائب وزیراعظم نے سماجی رابطے دے پلیٹ فارم ایکس اُتے اپنے پیغام وچ جمہوریہ ترکیہ دے قیام دی 103ویں سالگرہ دے موقعے اُتے ترک صدر رجب طیب اردوان، وزیر خارجہ حاقان فیدان، حکومت تے برادر ترک عوام نوں دلی مبارکباد پیش کیتی۔ انہاں پاکستان تے ترکیہ دے درمیان دیرینہ برادرانہ تعلقات نوں ہور مضبوط بناؤن دے عزم دا وی اعادہ کیتا۔
