حکم نہ منّیا تاں جیل بھیج دیاں گا، جسٹس اعظم سی ڈی اے حکام اُتے برہم
سزا 6 مہینے ہووے گی، جسٹس اعظم سی ڈی اے حکام اُتے برہم
سیکٹر ڈی 12 دے قبرستان نوں مسمار نہ کرن دا حکمِ امتناع برقرار، سفری پابندیاں دے کیس وچ سیکرٹری داخلہ تے ڈی جی ایف آئی اے توں جواب طلب
اسلام آباد (رضوان قاضی) اسلام آباد ہائیکورٹ دے جسٹس اعظم خان نے وفاقی دارالحکومت دے سیکٹر ڈی 12، موضع سری سرال وچ قبرستان نوں مسمار کرن توں روکّن دا حکمِ امتناع برقرار رکھدیاں سی ڈی اے حکام نوں آکھیا کہ جے ایس واری وی عدالتی حکم نہ منّیا گیا تاں توہینِ عدالت دے تحت اوسے ویلے جیل بھیج دیاں گا تے پوری چھ مہینے دی سزا دیاں گا۔
مقامی رہائشیوں دیاں درخواستاں نوں اکٹھیاں کرکے سماعت کیتی گئی۔ وکیل نے آکھیا کہ عدالتی حکمِ امتناع دے باوجود کل کارروائی کرن لئی آ گئے سن۔
جسٹس اعظم خان نے برہمی دا اظہار کردیاں آکھیا کہ جے ایس عدالت دے حکم دی خلاف ورزی ہوئی تاں میں سنواں گا وی نہیں۔ ساریاں نوں دس دیو کہ عدالتی حکم دی خلاف ورزی اُتے جیل بھیج دیاں گا۔
سی ڈی اے تے ہور فریقین نوں جواب جمع کراؤن لئی مہلت دیندے ہوئے سماعت ملتوی کر دِتی گئی۔
دوجے پاسے اسلام آباد ہائیکورٹ نے بیرونِ ملک سفر کرن والے شہریاں اُتے غیر ضروری سفری پابندیاں دے کیس وچ سیکرٹری داخلہ، ڈائریکٹر امیگریشن تے ڈی جی ایف آئی اے توں جواب طلب کر لیا۔ اک اہم قانونی معاملے وچ معاونت لئی اٹارنی جنرل نوں وی نوٹس جاری کردیاں کیس دسمبر دے پہلے ہفتے وچ مقرر کرن دا حکم دِتا گیا۔
جسٹس ارباب محمد طاہر نے سماعت دا حکمنامہ جاری کیتا۔
