حنا جاوید کیس، آصفہ بھٹو نے عدالتی کمیشن قائم کرن دی حمایت کر دِتّی

اہل خانہ نال ملاقات، سارے پہلوواں دی منصفانہ تے شفاف طریقے نال تحقیقات دی یقین دہانی، بی آئی ایس پی ہیڈکوارٹرز دا دورہ، اجلاس، خواتین نوں بااختیار بناؤن سمیت ہور معاملات دا جائزہ

اسلام آباد (نامہ نگار، این این آئی) رکن قومی اسمبلی آصفہ بھٹو زرداری نے پارلیمنٹ وچ مقتولہ حنا جاوید دے اہل خانہ نال ملاقات کیتی تے کیس دی جامع تحقیقات لئی عدالتی کمیشن قائم کرن دی حمایت کر دِتّی۔ ملاقات دوران آصفہ بھٹو نے انصاف دی فراہمی لئی اہل خانہ نوں مکمل تعاون دی یقین دہانی کرائی۔

سماجی رابطے دے پلیٹ فارم ’’ایکس‘‘ اُتے اپنی پوسٹ وچ آصفہ بھٹو نے آکھیا کہ اہل خانہ عدالتی کمیشن قائم کرن دا مطالبہ کر رہے نیں، مینوں امید اے کہ انہاں دے مطالبے اُتے مناسب غور کیتا جائے گا تے مقدمے دے سارے پہلوواں دی منصفانہ تے شفاف انداز وچ تحقیقات کیتیاں جان گیاں۔

دریں اثنا بی بی آصفہ بھٹو زرداری نے بی آئی ایس پی ہیڈکوارٹرز دا دورہ کیتا تے پروگرام دے تحت غربت دے خاتمے، خواتین نوں بااختیار بناؤن، مالی شمولیت تے ہنرمندی دی ترقی لئی کیتے گئے اقدامات دا جائزہ لین واسطے اجلاس دی صدارت کیتی۔

ایوانِ صدر توں جاری بیان دے مطابق آصفہ بھٹو نے کمزور معاشی حالات دا شکار خاندانوں دی مدد تے خواتین نوں بااختیار بناؤن وچ بی آئی ایس پی دے کردار نوں سراہیا۔ اجلاس وچ خواتین نوں بااختیار بناؤن سمیت ہور معاملات دا جائزہ لیا گیا۔ اجلاس وچ رکن قومی اسمبلی شازیہ مری، سینیٹر سردار الحاج محمد عمر گورگیج سمیت ہور سینئر حکام نے شرکت کیتی۔