ماضی وچ میڈیکل دے ناں اُتے پرفیوم تک خریدے گئے: آئینی عدالت
پی آئی اے اپنے سابق ملازمین نوں دھتکار کے نہ رکھے: جسٹس حسن اظہر، جواب جمع کراؤن دا حکم
اسلام آباد (حسیب ریاض ملک) وفاقی آئینی عدالت نے پی آئی اے دے ریٹائرڈ ملازمین نوں طبی سہولتاں دی فراہمی نال متعلق کیس وچ قومی ایئرلائن نوں جواب جمع کراؤن دا حکم دے دِتا۔
جسٹس حسن اظہر رضوی نے ریمارکس دِتے کہ ادارہ اپنے سابق ملازمین نوں دھتکار کے نہ رکھے بلکہ انسانی ہمدردی دی بنیاد اُتے معاملے نوں ویکھے۔ ایہہ وی حقیقت اے کہ میڈیکل سہولتاں دے غلط استعمال نے اداریاں نوں نقصان پہنچایا اے۔ جیہڑے فراڈ کردے نیں، انہاں خلاف بے شک سخت کارروائی کرو۔ ماضی وچ میڈیکل سہولت دے ناں اُتے پرفیوم تک خریدے جاندے رہے نیں۔
علاوہ ازیں وفاقی آئینی عدالت نے ہمدرد لیبارٹری نوں ایوریج بل چارج کرن دے معاملے وچ لاہور ہائیکورٹ دا فیصلہ برقرار رکھدیاں لیسکو دی اپیل خارج کر دِتّی۔
کیس دی سماعت جسٹس عامر فاروق دی سربراہی وچ دو رکنی بینچ نے کیتی۔ جسٹس عامر فاروق نے ریمارکس دِتے کہ جے میٹر خراب سی تاں ذمہ داری کس اُتے عائد ہوندی اے؟ میٹر تاں لیسکو دی ملکیت اے۔ صارف اُتے میٹر وچ ردوبدل دا کوئی الزام نہیں۔
لیسکو دے وکیل نے دسیا کہ میٹر دے اگلے تے پچھلے دونوں حصے خراب سن، جس کرکے ایوریج بلنگ کیتی گئی۔
مزید برآں وفاقی آئینی عدالت دے چیف جسٹس امین الدین خان تے جسٹس علی باقر نجافی اُتے مشتمل بینچ نے جونیئر کلرک دی آسامی دے امیدوار موسیٰ حیات دی درخواست منظور کردیاں پشاور ہائیکورٹ دا فیصلہ کالعدم قرار دے دِتا۔
عدالت نے قرار دِتا کہ سرکاری ملازمتاں لئی مقرر کیتیاں اہلیت دیاں شرطاں واضح تے غیر مبہم ہونیاں چاہیدیاں نیں تے بھرتی دے عمل وچ سارے امیدواراں اُتے اکّو جیہا معیار لاگو کیتا جانا چاہیدا اے۔
