دوہری شہریت لُکاؤن والے افسراں خلاف کارروائی لئی وزیراعظم توں اجازت منگ لئی گئی

اسلام آباد (این این آئی) اسٹیبلشمنٹ ڈویژن نے دوہری شہریت لُکاؤن والے سرکاری افسراں خلاف کارروائی کرن لئی وزیراعظم توں اجازت منگ لئی اے۔

نجی ٹی وی دے مطابق اسٹیبلشمنٹ ڈویژن نے وزیراعظم آفس نوں سمری بھجوا دتی اے تے ڈیکلریشن جمع نہ کراؤن والے افسراں خلاف کارروائی دا اختیار منگیا اے۔

اسٹیبلشمنٹ ڈویژن دے مطابق تقریباً 3 ہزار اعلیٰ سرکاری افسراں وچوں اکثریت نے ہن تک حلف نامے جمع نہیں کروائے، جدکہ ہن تک صرف 8 فیصد افسراں نے اپنی یا اپنے اہلخانہ دی غیر ملکی شہریت ہون دا اعتراف کیتا اے۔

وزیراعظم توں گریڈ 20 توں 22 دے افسراں خلاف کارروائی دی اجازت منگی گئی اے۔ متعلقہ افسراں دی ترقی روکی جا سکدی اے، لازمی ریٹائرمنٹ دتی جا سکدی اے یا انہاں نوں نوکری توں برطرف وی کیتا جا سکدا اے۔

وزیراعظم دی منظوری توں بعد افسراں نوں شوکاز نوٹس جاری کیتے جان گے۔