ایران تے امریکہ وچ ثالثی: جے مثبت پیش رفت نہ ہوندی تاں فیلڈ مارشل دو واری تہران نہ جاندے: فوجی ترجمان
سعودیہ دے دفاع لئی پاکستان پُرعزم، ہور پاکستانی فوجیاں دی تعیناتی دا فیصلہ صورتحال تے سیاسی قیادت دی منظوری نال ہووے گا، پاکستان یمن دے اندرونی تنازع دا حصہ نہیں: ڈی جی آئی ایس پی آر
ایران سمیت کوئی وی ملک مکہ دفاعی معاہدے وچ شامل ہو سکدا اے، خیبر پختونخوا وچ دہشت گردی خلاف انٹیلی جنس دی بنیاد تے کارروائیاں دا دائرہ ودھایا جائے گا: لیفٹیننٹ جنرل احمد شریف دا انٹرویو
راولپنڈی (رائٹرز) فوجی ترجمان لیفٹیننٹ جنرل احمد شریف چودھری نے آکھیا اے کہ ایران تے امریکہ وچ ثالثی دے معاملے تے اسیں محتاط انداز وچ پُرامید آں۔ فیلڈ مارشل دا ایس مہینے دو واری تہران جانا مثبت پیش رفت دی نشانی اے۔ تازہ ترین دورہ پیر نوں سعودی تے ترک حکام دے نال کیتا گیا۔ جے مثبت پیش رفت نہ ہوندی تاں فیلڈ مارشل دو واری تہران نہ جاندے۔
ڈی جی آئی ایس پی آر لیفٹیننٹ جنرل احمد شریف نے جمعے نوں انٹرویو وچ ناں لیے بغیر مزید آکھیا کہ ہن وی کجھ طاقتور تخریب کار تے مخالف موجود نیں، جیہڑے سمجھدے نیں کہ لڑائی یا کشیدگی انہاں دے مفاد وچ اے۔
راولپنڈی وچ انٹرویو دوران احمد شریف چودھری نے ایہہ دسنے توں گریز کیتا کہ تہران وچ ہون والیاں ملاقاتاں دوران کنہاں معاملات تے گل بات ہوئی یا امریکہ نے تازہ ترین دورے دی حمایت کیتی سی یا نہیں۔
پاکستان، سعودی عرب تے ترکیہ نے 7 اگست نوں مشترکہ مکہ دفاعی معاہدے تے دستخط کیتے سن، جس دے تحت کسے اک ملک تے حملے نوں تیناں ملکاں تے حملہ تصور کیتا جائے گا۔
ایس معاہدے توں بعد ایران جنگ تے خطے وچ وڈے تصادم دے خدشیاں دے تناظر وچ ایس دی اہمیت ہور ودھ گئی اے۔
احمد شریف چودھری نے آکھیا کہ مشترکہ دفاعی معاہدے دیاں شرطاں وچ نویں ارکان دی شمولیت تے کوئی پابندی نہیں۔ انہاں کولوں پچھیا گیا سی کہ کی ایران وی ایس معاہدے وچ شامل ہو سکدا اے؟
انہاں آکھیا، جیہڑا وی اجتماعی دفاع تے علاقائی امن دے مشترکہ تصور نال اتفاق رکھدا ہووے، اوہ کیوں نہیں؟ ساریاں دا خیرمقدم اے۔ تاہم انہاں واضح کیتا کہ ایس بارے فیصلہ تیناں بنیادی فریقاں دی سیاسی قیادت کرے گی۔
سعودی عرب وچ ہور پاکستانی فوجی بھیجن دے امکان بارے سوال تے انہاں آکھیا کہ ایہہ فیصلہ حالات تے دوناں ملکاں دی سیاسی قیادت دی منظوری تے منحصر ہووے گا۔
انہاں آکھیا کہ پاکستان سعودی عرب تے مقدس مقامات مکہ مکرمہ تے مدینہ منورہ دے دفاع دے عزم تے قائم اے۔ انہاں دا کہنا سی کہ پاکستان یمن دے اندرونی تنازع دا حصہ نہیں اے۔
ملکی صورتحال بارے گل کردیاں ڈی جی آئی ایس پی آر نے آکھیا کہ خیبر پختونخوا وچ دہشت گردی خلاف کارروائیاں دا دائرہ ہور ودھایا جائے گا، تاہم ایہہ کارروائیاں انٹیلی جنس معلومات دی بنیاد تے کیتیاں جان گیاں۔
